Mizoram Upa Pawl General Assembly Vawi 51-na neih a ni

Hnahthial Post | April 29, 2026, Aizawl: Vawiin khan Vanapa Hall-ah Mizoram Upa Pawl(MUP) General Assembly (Inkhawmpui Lian) vawi 51-na neih a ni a. Social Welfare, Women & Child Development Secretary Pi Lalzarmawii chuan khualllian niin a hmanpui.

Pi Lalzarmawii chuan kum upate chu chhungkua, kohhran leh khawtlang tana an thatlai hun chhung zawng an hman thu sawiin, kan ram hmasawnna atana an thawh tawhnaah te lawmthu a sawi a. Sawrkarin Old Age Pension (Upa Pension) cheng 1000 laia a tipung thei chu lawmawm a tih thu sawiin, Ministry of Tribal Affairs hnuaia MUP General Headquarters enkawl tur Multi Service Centre Zemabawka sak mek te pawh tihpuitlin vat theih a beisei thu a sawi. Social Welfare Department hnuaia Ainawn Venga kum upate enkawlna hmun (old age home) tihchangtlun zelna tura hmalak a nih tur thu a sawi a. National Social Assistance Programme (NSAP) hnuaia Old Age Pension Central leh State atanga kan hmuh tur te chu a theih chin chin tun hnai maia pek chhuah tura hmalak mek a nih thu a sawi.

Khuallian chuan MUP ten sawrkar tha taka an lo thawhpui tawhnaah lawmthu sawiin mipui te hmasawnna tura thawhhona tha tak an neih zel a beisei thu a sawi a. Khawtlang leh ram nuam zawk kan siam theih nan kum upate tana khawvel nuam zawk siam hi mitinte mawhphurhna a nih thu a sawi.

MUP Headquarters chuan nikum 2025 bikah mi 10 hnenah kum 100 tlingte chawimawina (citation) leh lawmpuina thilpek (cheng 1000) hlan tawhin, kum 2010 atanga 2025 thleng khan he chawimawina hi mi 236 hnenah a hlan tawh a ni.

He programme-ah hian MUP Member thi ta mi 1945-te sunna hun hman a ni a. Tun dinhmunah MUP member mi 70,102 awm mekin Mizoram pawn Jampui Area, Tripura bakah Branch 13 lai a awm tawh bawk a ni.