.jpg)
Hnahthial Post | April 28, 2026, Aizawl: Vawiin ni 28 April, 2026 (Thawhlehni) khan Mizo Zirlai Pawl(MZP) chuan, Mizoram Board of School Education(MBSE) in High School Leaving Certificate (HSLC) 2026 result a tichhuah taka Mizo zirlai ti tha top-10 chawimawina hun an nei a, he hunah hian Dr. Vanlalthlana, Minister School Education Dept. chu Khuallian niin, Maj. Richard Vanlalnghaka chuan hunserh hmangin, MZP Vice President Pu Sanghmingthanga kaihhruainain hun hi hman a ni.
MZP President Dr. C. Lalremruata chuan, " Mizoram Sorkarin kumin atangin result bu-ah Ranking leh Division te tarlan tawhloh nise tih chu MZP chuan Mizo Zirlaite zingah In elna thianghlim a awm theihna atan tarlan ngei nise kan duh a. Mi thenkhat ten MZP ten kum tina an lo tih thin top 10 chawimawi theihloh dawn avanga duhlo anga min ngaihna hi thudiklo a ni” a ti.
MZP President chuan, “MZP chuan zirna kawnga hma kan sawn theih nan Question pattern leh Exam system bakah kan syllabus te siamtha in midang te el pha ve tura hmalakna hi zirna kawnga hma kan sawnna atan chuan hmalakna hmasa turah kan ngai a. Nakum lam atang chuan Sorkar thuneitute pawh Mizo Zirlaite zingah inelna thianghlim zawk a awm theih nan kum lo la kal leh zel turah pawh Result Bu-a Top 10 leh Division tarlang ngei turin kan ngen nawn leh a. Kumin result a Govt School fail an awmlo hi hmasawnna ropui tak a ni" a ti.
Tin, zirtirtu Indaihlo te, mahni post a awm thaduhlo te, attach tam lutuk hi MZP chuan a ngaimawh hle a, zirna kan ngaih pawimawh ber tur a nih laiin leh Mizoram khawtinah sikul te kan neih vek avangin Zirna kaihhnawih bik khawitu tur “Mizoram Education Service” neih vat hi MZP chuan ngaiin a hria a, kan Education Minister ngei pawhin a pawimawh zia a hria a, Mizo zrialite hmakhaw ngaia tihnhlawhtlin vat a nih theihnan thuneitu te kan ngen nawn tak meuh a ni.
Pu Remruata chuan, Tunhnaiah thil pawi tak leh zahthlak tak Zirtirtu leh naupang inngaizawng emaw zirtirtu in naupang a ngaihzawn chanchin sawi tur a awm a, harsatna nei a MZP Pisa Pui a rawn tlan lut hial an awm thu sawiin, zirtirtu an nihna hmang tangkaia naupang laka advantage lo la an awm hi MZP chuan a dem takzet a.Kan zirlai bakah nundan thlenga min zirtirtu tura kan ngaih te’n an naupangte chunga hetiang rilru an pu hi a mak a, an demawm takzet a ni. Hemi chungchangah hian kan zirtirtu zahawm tak tak te fimkhur lehzual turin a ngen a, kan sorkar thuneitute pawh a tul anga hma la turin a ngen bawk.
Khuallian Dr. Vanlalthlana chuan, zirlai kalkhawmte hnenah fuihna thu sawiin, “Textbook piah lam kan thiam a ngaih thu leh byheart system a kal lo a, kan thiamna tak tak paw chhuak thei tura zir turin a fuih a, question pattern a danglam chho zel dawn a, chumi mil chuan in inher rem chhoh ve zel a ngai dawn a, in thiamna tak tak lan theihna tur question kan rawn buatsaih chho zel dawn a ni” a ti.
Khuallian chuan, Zirlai kan nih chhunga kan hlawhtlinna chan chhan chu kan nu leh pa, zirtirtute leh klhawtlang hruaitute tawngtaisakna che u a ni tih hria a, chung kan tana theihtawp lo chhuah tute kan hriat reng a ngai a, kan hriat loh ni la la in kan tlahiam dawn a ni. Vawiin a kan chawimawite hian thiamna hi ram leh hnam, khawtlang tana hmang turin a fuih a ni.
Pu John Lalpeka pawhin zirlaite fuihna thu sawiin, “Vawiin a zirlaite hian kan thiante nen a inkawm reng kan duh chuan an ke pen rual leh an hlawhtlin ruala ke pen ve zel tum turin a fuih a, khawvel a thil nawm hmel tak takte hi a nuam tak tak lo a, Social media a kan hmuh anga awm kan tum ve ngawt chuan a pawi dawn hle a ni” a ti.
HSLC EXAMINATION 2026 A MIZO TI THA TOP-10 CHAWIMAWINA HLANTE:-
- Rachel Biakthapari d/o Salai Chan uk(St. Joseph HSS)
- Marvin Lalrinenga s/o Aldrin Lalrinsanga(St. Paul HSS)
- Vanmalsawma s/o Thaneihliana(Mt. Carmel School
- H. Lalramdinpuii d/o H. Laikhuma(St. Joseph HSS)
- Federic Vanlalchhuanga s/o C. Lalhmangaihi(St. Paul HSS)
- Vanlalruatfeli d/o H. Lianzela(Mt. Carmel School)
- R. Lalpekhlui d/o Thangdailova(Living Water School)
- Sarah TH Zonunmawii d/o TH Khawtinkhuma(St. Joseph HSS)
- Michael Laldinmawia s/o C. Lalngaihawma(Divine Intervention School)
- Lalpekhlua s/o C. Lalruaia(St. Paul HSS)
- Vanlalhlupuii d/o Lalmuansanga(St. Joseph HSS)
- Valentino Lallawmawma s/o Lalhriatpuia(St. Joseph HSS)
- Polly Lalmuansangi d/o Lalthlamuana(St. Paul HSS)
- Zonunsangi d/o H. Zahmingthanga(St. Paul HSS)
- LH Laltleipuii d/o LH Lalbiakenga(Holy Faith School)
- Lallawmzuala s/o Lalbiakthanga Pachuau(Mt. Carmel School)
- Rommel Lalchungnunga s/o EL Malsawmzuala(St. Joseph HSS)
- Johny Lalruatfela s/o Kapmawia(CLS Academy)
MZP chuan, kumin HSLC Exam 2026 a Mizo zirlai titha zual 10 te chawimawina hun kan buatsaih hi kum danga buatsaih thin Top 10 a Mizo tlingte nen a in ang lo a, kumin HSLC exam result a Mizo titha zual, Mizo top 10 a mi sawmpariat (18) lai an lang chu MZP chuan lawmawm ati hle a, zirlai hlawhtlinna chang zawng zawngte thinlung takin a lawmpui takzet a. Chutih rualin, la hlawhtling ve rih lote pawh beidawng mai lova, rilru thar nen hmalam pan turin duhsakna an hlan a ni.
