Social Welfare Minister Pi Lalrinpuii'n Ministry of Social Justice & Empowerment buatsaih review meeting 'Chintan Shivir' hmanpui

Hnahthial Post | April 27, 2026, Aizawl: Ni 24.4.2026 (Zirtawnpni) atanga hman tan, Ministry of Social Justice & Empowerment, Government of India buatsaih ni -3 chhung awh review meeting - Chintan Shivir chu The Lalit Hotel, Chandigarh ah neih a ni a. He hunah hian Mizoram aiawhin Social Welfare Minister Pi Lalrinpuii chu a tel.

Pi Lalrinpuii chuan, Ministry kalpui lai scheme hrang hrangte hlawk zawka kalpui a nih theihnan, theme bik neiin member te then hrangin, sawihona hun a hranpaa an hmang thin chu a hlawkpui thu a sawi a. Mizoram lamah pawh hetiang anga meeting huaihawt ve ngei a duh thu a sawi. Heng sawihona hrang hranga point pawimawh tarlan te chu ministry in uluk taka lo ngaihtuah turin a ngen a. India ram chu hnam ze hrang hrang awmna, tawng leh sakhaw hrang hrang nei, sik leh sa thleng pawha inang lo tak tak te chenkhawmna a nih avangin an danglamna te hre reng chunga, scheme leh project kalpui dan tur duang thin turin a ngen bawk. Mizoram chu ram inlungrual leh tangrual an nih thu sawiin, thil thaah chuan mipui, Sawrkar leh tlawmngai pawl te tha taka an thawkho thin a; chu chuan ram mipuite tana hmalaknaah hlawhtlinna a thlen thin, a ti a. Mipui ten an ta neih tak tak theih scheme leh project siam a pawimawh thu Pi Lalrinpuii chuan a sawi a ni.

He review meeting - Chintan Shivir ah hian Ministry of Social Justice & Empowerment hnuaia hmalakna hrang hrang thlirho a nih bakah hmachhawp hrang hrangte chak zawk leh tha zawka kalpui dan tur sawiho a ni a. Social Justice Delivery kawnga mipuite nena tanhona tha zawk neih theih dan tur te mai bakah Public Private Partnership mode a kal chhoh dan tur kawng te ngaihtuah ho a ni. MOSJE hnuaia hmalakna kalpui dan hrang hrang awlsam zawk dapin, a dawngtu tur tak te hnena Sawrkar hmalakna tha taka a thlen ngei theihna tura hmalak dan turte bakah, MOSJE hnuaia hmalakna hrang hrang chungchanga awareness tha zawk neih theih dan turte ngaihtuah ho a ni bawk. Ministry hnuaia hmalakna hrang hrang SAMAVESH portal te, NMBA 2.0 apps te, SETU apps te, SMILE apps te bakah beggar homes atana guidelines te tlangzarh a ni nghal bawk.

He hunah hian Union Minister - Dr Virendra Kumar, Union Minister of State Pu BL Verma te bakah state hrang hranga Social Welfare leh a kaihhnawih Department changtu Minister te leh Department Officials te an tel a. Mizoram atang pawhin Pi Lalzarmawii, IAS, Commissioner & Secretary; Pi Gracy Lalchhanzuali, Deputy Director, Social Welfare Department leh Pu H. Lalhruaitluanga, PS to Minister ten Minister hi an tawiawm a ni.