Hnahthial Post | April 27, 2026, Srinagar: India rama Sports Minister te inkhawmpui, ‘Chintan Shivir of Ministers of Youth Affairs and Sports of States/UTs’ chu nimin leh vawiin khan Srinagar-a Sher-i-Kashmir International Conference Centre (SKICC) ah neih a ni. He hunah hian Mizoram Sports & Youth Services Minister Pu Lalnghinglova Hmar chu telin session pakhat a kaihruai.
Ministry of Youth Affairs and Sports (YAS) buatsaih Sports Minister Conference hi Union Youth Affairs & Sports Minister Dr. Mansukh Mandaviya leh Minister of State Pi Raksha Nikhil Khadse te’n a bul aṭanga a tawp thlengin an uap a. Session pasarih awmin, Mizoram Sports Minister Pu Lalnghinglova Hmar chuan, “Khelo Bharat Niti: Strengthening Centre State Coordination” tih session a kaihruai a ni.
India in Olympic Games 2036 thlen tumin hma a la mek a, Olympic lam hawiin India sports kalphung a inher mek. Sports Minister ‘Chintan Shivir’ pawh hi Olympic Games 2036 a medal tam zawk la thei tura inbuatsaihna lam hawia kalpui a ni.
Mizoram Sports Minister Pu Lalnghinglova Hmar chuan Indian sports kalphung inthlak mek chu lawmawm a tih thu sawiin, “Olympic 2036 thlir chunga hmalakna chuan sports discipline zawng zawng a huam thei dawn lo a, Olympic medal beiseiawmna discipline te thlur binga duat bik an ngai. Kan kal dan ngai renga kan kal chuan kan result pawh a ngai reng dawn a, hmasawn tur chuan thlak ngai a awm thin," tiin India-in sports a kalpui dan a thlak a ṭul thu a sawi a; Sports Authority of India siam țhat ṭul a tih thu a sawi chhuah bakah Delhi aṭanga thutlukna siam mai loin state hrang hranga sports official leh association te zin chilh thin turin sawrkar laipuia sports hotute a sawm bawk.
Pu Tetea Hmar chuan infiammite hmasawnna’n coaching lama hnasawn hmasak a pawimawh tih a sawi a; Olympic Games 2036 hmathlir nei chungin kum 2024 ah Mizoram Sports Conclave buatsaih a nih thu leh, Bana Kaih ‘Empowering Mizoram Sports’ hnuaiah naupang kum 8 – 15 inkar tan state pum huapa coaching kalpui mek a nih thu a tarlang. School Education Department nen tangkawpin ‘Grassroot Sports Development Programme’ hnuaiah school naupangte sports coaching pek an nih thu sawiin, age group inelnaa kum dik lo awm thin tibo tura Mizoram hmalakna a tarlang bawk a ni.
Mizoram Sports Minister chuan sawi chhunzawmin, “Sawrkar laipui piah lamah state leh state inkarah pawh thawhhona tha neih a pawimawh a, state hmalakna leh ‘best practice’ te kan inhriattawn zung zung theih dan tur ngaihtuah a ngai. Sports infrastructure kan neihte a la tha tawk lo a, kan infiammite hmasawnna’n state lian leh hausa zawkte infrastructure kan hman tangkai theih dan duan a ngai. Hetianga kan tanrual chuan India in hma a sawn phah ang,” a ti.
Union Sports Minister Dr. Mansukh Mandaviya pawhin India rama sports tihhmasawn kawngah state ten mawhphurhna sang tak an nei tih a sawi a. “Kum 10 chhunga sports powerhouse ni turin ruahmanna kan siam a, he ruahmanna hi lehkhapuanah chauh ni lo, district tina infiamna hmunah te a takin a langchhuak tur a ni.” tiin state Sports Minister leh official kalkhawmte chu a taka hma la chak turin a chah.
Ni hnih awh Sports Minister Conference-ah hian sports kaihhnawih topic hrang hrangah India dinhmun leh hmasawn ngaihna lai te thlirho niin, Olympic 2036 tinzawnin sawihona tam zawk hi kalpui a ni a; zirna in leh sports kaihkawp (integrate), training facility changtlung zawk neih, sports technology leh sports science tihhmasawnte chu ngaihpawimawh zingah a tel.
Talent development mumal leh inphaman zawk neih te, sports inrelbawlna (governance) felfai zawk te, sports bungrua tha zawk siamchhuah leh thalai kaihhnawih thil dangte conference-ah hian sawiho a ni.
Sports Minister ‘Chintan Shivir’ 2026 ah hian state 15 atangin Sports Minister an tel a. Ministry of Youth Affairs & Sports, Sports Authority of India leh state hrang hrang sports official te bakah National Sports Federation hotu te, infiammi langsar tak tak Abhinav Bindra, Pullela Gopichand, MM Somaya, Gagan Narang leh Adille Sumariwalla te an tel bawk.
Pu Lalnghinglova Hmar hi Mizoram atangin Pu Henry C. Lalrawnkima, Secretary, Mizoram State Sports Council leh Pu H. Lalramenga, PS to Minister ten an tawiawm a ni.
Chintan Shivir (Sports) 2026 a session hrang hrangte :
1. Medal Strategy – Khelo India Mission.
2. Khelo Bharat Niti: Strengthening Centre-State Coordination.
3. Clean and Safe Sport
4. Talent Identification and Development
5. Sports Governance
6. Sports Goods Manufacturing
7. Youth Engagement through MY Bharat
Tags
News