Hnahthial Post | May 19, 2026, Hmunpui: Vawiin khan Hmunpui khawtlang chuan an khaw kawngpui black top thar te, an khaw Health Sub Centre building leh Quarters thar te, Chief Minister Rubber Mission thawh hnihna atanga an khuain Rubber Hectare 25 chinna an hmuhte lawmna an khaw Community Hall-ah an nei a, Pu Lalduhoma, Chief Minister chuan a telpui. Bialtu MLA Er. H. Lalzirliana'n Chief Minister hi a tawiawm.
Thusawiin Chief Minister chuan, Hmunpui khawtlangin Blacktop kawngpui thar, BC ngata siam in neih avanga in lawmna thusawite ka lo hmu ve a. A hmutu apiangten an lawmpui che u niin ka hria. Kei pawhin ka lawmpui che u a ni.
In khaw kawng hi PMGSY hmanga Cell filled Concrete-a siam a lo ni tawh a, a lo chhiat tak avangin kan sorkar hian SASCI 2025-26 Part 1 atangin cheng vaibelchhe thum (3 Crore) sengin kan siam tha ta a ni.
Kan ramin ruahtui a dawng tam thin a, kan kawngpuite an chhe hma riau a. In khaw kawng pawh hi duat taka in lo enkawl zui loh chuan a tlo lo vang tih a hlauhawmin ka hria.
Chief Minister ka nih tirh khan Rubber Board of India Chairman Dr. Shawar Dhanania chuan min rawn hmu a. Tripura State-in Chief Minister Rubber Mission tha taka an kalpui anga Mizorama kalpui ve tha a tih thu a rawn sawi a. Rubber chin theihna ram hi kan nei tha a, Rubber hi kum 40 thlenga hnai theih a, a hnai tlak tawh loh hnuah Thingzaia hman zui leh theih a ni a. Ramngaw a siam a, tuihna a tipung a, a hralhna a tha bawk si a. Tripura lamah a zirchiang turin official team ka tir thla a. An report-te kan han ngaithla a, kan kalpui ve ta a ni. CM Rubber Mission hmang hian ram Hectare 11500 a zauah Rubber kung nuaih 51 chuang phun thar kan tum a ni.
Kan thawhpui (progress partner) te hi a tirah Hectare khat theuh han pe phawt ila, a tul anga zauh zel theih turin hma lo la se kan ti a. First Phase-ah khan Potential kan neih thatna Mamit leh Kolasib District-ah; Hectare 1,000 a zauah bul kan tan a. Second Phase-ah hian District pariatah Hectare 2,575 a zauah kan kalpui leh ta a. Hmunpui pawhin Hectare 25 in chang ta ni.
In Sub Centre hi sak that a tul hle tih kan hria a. NABARD RIDF 30 hnuaiah kan rawn thun a, tunah chuan a lo puitling ta a. Ka lawmpui hle che u a. Mipuiten tangkai takin in lo hmang dawn nia, tiin a chah.
Hmunpui chu zirna ngaisang khua, khaw taima leh Lengpui Airport khawl pawimawh DVOR bunna hmun a ni a. Khaw pawimawh tak in ni. Sorkar pawhin a theihna apiangah a ngaisak zel dawn che u a, in khaw power supply lakna kalkawng pawh hi a tharin survey kan nei mek a ni, a ti.
Er. H. Lalzirliana, bialtu MLA pawhin thusawiin, Chief Minister-in Hmunpui a tlawhnaa tawiawm turin min sawm avangin ka lawm hle a. A kaihhruai sorkar hnuaia hun reilote chhunga hmasawnna duhawm tak tak Hmunpuiin a hmuh avang pawhin lawmthu ka sawi a ni, a ti a. Khawtlang hmasawn zelna tura hmalak ngai nia a ngaihte a tarlang bawk.
Pu H. Lalduhsanga, Vice President, VC chuan khawtlang aiawha lawmthu sawina a nei a. Metal Road kan la neih ngai miah loh kan nei a, Health Sub Centre leh Quarters thar kan nei a, chhungkaw 24 tan Rubber eizawnna min pe a. Khawtlang mipuite lawmna hi a sang em em a, thil danga kan indaidannate dah thain khawtlang mipuiten he hun hi kan buatsaih a ni, a ti.
Lawmthu sawina inkhawm hi Pu H. Lalkaisara, VCP chuan a kaihruai a, Pi Lalrinkimi'n hunserh a hmang a ni.
Tags
News