Hnahthial Post | May 24, 2026, Aizawl: Nimin khan Formosa Foundation ten Central YMA kaltlanga Branch YMA te hnena Oxygen Concentrator 500 hlanna inkhawm, Vanapa Hall-a an buatsaih chu Chief Minister Pu Lalduhoma chuan khuallian niin a telpui a, Lt. Gen. Vikas Lakhera, DG, Assam Rifles chu khualzahawm a ni.
Thusawiin Chief Minister chuan, Formosa Foundation hian kan ram leh mipuite tan thahnemngai takin hma an lo la tawh thîn a. Malsawmna thlentu an ni fo thin. Vawiinah an han luang chhuak leh thei hi kan lawm em em a ni, a ti.
Tlem lai khan Central YMA nena tangkawpin Group YMA 13 te hnenah Ambulance an pe a, MTP leh YLA Sub Hqr pakhat ve ve an pe a. Central YMA hnenah vek hian rikrum thila kan mamawh Puan In 500 leh Choka mamawh set 190 a lo pe tawh a. Ruihhlo dona atan YMA Sub Hqr 9 te chu Bolero Camper a pe a. School pahnih hnenah Bus a pe a, hnuchham inah te, damdawiinah te, kohhranah te thilpek an pe hnem tawh hle. Covid19 hripui len laia an hnathawhte phei kha chu a tam tham hle a, kan tangkaipui em em a ni, a ti.
Chief Minister hian Lt. Gen Vikas Lakhera leh Assam Rifles ten Mizoram tana hna an thawhna kawngah te, tun tuma semchhuah oxygen concentrator phurh kualna lama an lo tanpui avangtein lawmthu a sawi bawk.
Lt. Gen. Vikas Lakhera pawhin thusawiin, kan chhungkua hian oxygen concentrator hlutzia hi a takin kan lo tawng ve tawh a. Heng concentrator, vawiina semchhuahte pawh hi a mamawhtute tan a hlu dawn tih ka hria a. Mipuite ban phaka hetianga min petu Formosa Foundation te chungah lawmthu ka sawi a ni, a ti.
Pu Jonathan Lalremruata, Chairman Formosa Foundation pawhin thu a sawi a. Formosa Foundation chu tanpui ngaite tana ding, Mizoramin a mamawh an tih ve theih apiang ti thin a ni a. Oxygen concentrator pawh hi damloten tangkai takin lo hmang se kan duh a ni, a ti. Sorkar leh kan NGO te nena kan ram tana thawhho zel hi kan duh a ni, a ti bawk.
Oxygen Concentrator semna inkhawm hi Prof. Lalnuntluanga, Vice President, CYMA in a kaihruai a, Father Jerome Vungbiakdikan hunserh a hmang a. Prof. Malsawmliana, General Secretary, CYMA chuan report a pe a. Pu R. Lalngheta, President, CYMA pawhin thu a sawi bawk.
Tun tuma Oxygen Concentrator 500 te hi Mizoram chhung leh Assam, Tripura, Manipur- a YMA Branch thlan chhuahte bakah YLA leh MTP branch thenkhatten a hmunah hian an dawng nghal a. Zuangtui Branch YMA chuan an dawn tur hi Tripura Behliangchhip Branch te an kian a ni.
Tags
News