Hnahthial Post | May 20, 2026, Hnahthial: Vawiin khan Hnahthial DC Conference Hall-ah Special Intensive Revision (SIR) chhungchanga hriattur inzirtirna chu Hnahthial District chhunga Booth Level Office (BLO)-te bakah Supervisors leh Assistant BLO-te tan neih a ni a. District Election Officer (DEO) leh Bawrhsap ni bawk, Pi K.Vanlalruati chuan he huna rawn kalkhawmte chu uluk leh dik taka thawk a, District dangte entawntlak khawpa an hmachhawpte hlenchhuak turin a chah a ni.
DEO, Pi K.Vanlalruati chuan SIR chu roll revision satliah a nih loh thu sawiin roll revision pangngaia an tih ngai loh, in tin tlawh chhuah - House to House visit chu neih a nih tur thu a sawi a. Electoral roll-a awm sa chu rin tawp theih a nih tawh dawn loh avangin Enumeration form pawh in tinah semchhuah a tul tawh tur thu leh BLO te pawh tum dang aiin a hah deuh tur thu a sawi bawk. Hei vang hian BLO te chu roll revision dang aia an tan nasat a tul thu sawiin District dang entawntlak ni thei tura hma la theuh turin a chah a ni.
ERO leh leh Addl DC ni bawk, Pu Zothanmawia Khiangte chuan BLO kalkhawmte chu mi rintlak leh taima, tan bik ni lo tura ngaihte an nih thu sawiin chuvang tak chuan inlainatna avanga dik lo deuhva roll-a mi thun luh an awm loh a beisei thu a sawi a. SIR-ah chuan form thar siam a nih thu leh state dangah pawh roll atanga paih an tam thu sawiin chiang lo deuhva a hma a e-roll a lo lut emaw, dan ang taka e-roll a chuang thei lo tur emaw chu an hming paih hreh lo turin a chah nghal a ni.
Election Officer leh SDO (Sadar) ni bawk, Pu S. Kaptluanga chuan training an koh chhan ang ngeiin kalkhawmte chu an thiam loh te zawh hreh hauh lo turin a chah a. Inthlanna dik leh felfai awm tur chuan e-roll dik leh felfai kan neih phawt a tul thu sawiin chu mawhphurhna chu he huna kalkhawmte kutah a awm thu a sawi a ni.
SIR chungchanga hriattur pawimawh inzirtirna hi Master Trainer pahnih – Pi Christina Lalnunfeli, BDO leh Pu Lawrence Lalhlanthara, AERO/SDC te chuan an nei a ni.
Hnahthial District-ah hian Polling Station sawmhnih leh pasarih (27) awmin vawiin training-ah hian heng Polling station tana BLO theuhte chu kim takin an kal a. BLO bakah hian Supervisor pali (4) awmin Assistant BLO sawm leh pasarih (17) an awm bawk a ni.
Special Intensive Revision hi ngawrh taka kalpui chhoh tan tur niin ruahman lawk dan chuan May ni 20 atanga May ni 29 thleng hian Training leh inbuatsaihna hrang hrangte kalpui tan a ni ang a. BLO te hian May ni 30 atanga June ni 28 thleng hian Enumeration form sem leh lakkhawmna hun neiin, House to House Visit an nei dawn a ni. Draft Electoral Roll hi July ni 5, 2026 ah tlangzarh a ni ang a, Final Electoral roll hi September ni 6, 2026 –ah tlangzarh a ni ang.
Tun SIR-ah hian 01.07.2026 –a kum 18 tling chinte tan e-roll ah inziah luh theih a ni ang.
Tags
News