Hnahthial Post | May 19, 2026, Aizawl: Vawiin May ni 19, 2026(Thawhlehni) Chhun dar 12:30 khan Home Minister Pu K Sapdanga hovin Mizoram Sawrkar leh HPC-D(LF) te Inremna thuthlung (Memorandum of Settlement) in a ken tel, Charter of Demands-a tarlan point hrang hrangte tihhlawhtlin dan tur leh a bawhzui dan tur relin Home Department Official te an thukhawm.
Charter of Demands-ah hian Pu Lalhmingthanga Sanate hova HPC-D Cadre inpe tate intundinna tur mai ni lo, Hmar tlang dung huap hmasawnna tur rawtna tha tak tak a tel a. Inkalpawhna tha siamte, mipui mamawh tak tak - Zirna in tha leh Sawrkar Office din belh te leh lo neia eizawngte tana chhenfakawm, Agro-based industries din leh a dangte a tel a ni.
Meeting chuan HPC-D(LF) te mamawh leh ngenna hrang hrangte chu uluk taka thlir nawnin Department hrang hrang kaihhnawih thil a nih hlawm avangin, a changtu Department theuhvah hma lak thuai a nih theih nan lehkhaa thlen ni se, an ti a. A theih ang anga bawhzuiin hmalakna report pawh dil khawma thlirho leh thuai ni se an ti bawk.
Meeting-ah hian Adviser to CM (Pol) Pu Lalmuanpuia Punte, Home Secretary leh Home Department Officerte bakah, Sr. SP, CID(SB) te an tel bawk.
Tags
News