“India ram pumpui min hrut tu SIR ah hian mipui leh ECI beiseina tihlawhtling turin tan kan lak a ngai” Dr Lalrozama, Chief Electoral Officer

Hnahthial Post | May 18, 2026, Aizawl: India ram pumpuiah a tahtawlin Special Intensive Revision (SIR) of Electoral Rolls neih mek niin Mizoramah pawh kalpui tan a lo ni ta a. “SIR ah hian mipui leh ECI beiseina tihlawhtling turin tan kan lak a ngai” tiin Chief Electoral Officer Dr Lalrozama chuan vawiina SP Conference Hall-a SIR chungchang training hawnnaah thu a sawi.

Mizoram puma Election Officer, Electoral Registration Officer, Assistant Electoral Registration Officer leh District Level Master Trainer te tana buatsaih ni khat awh training hawnnaah hian CEO chuan Electoral Roll an khawih dawn avangin fimkhur hle a tul thu a sawi a. Mizoram khua leh tui dik tak ten vote an neih theihna turin, tihsual leh hmaih nei hauh lo a, uluk leh fimkhur taka hna thawk turin a fuih.

Block Level Officer te chu an kut ke ber tur an nih avangin hmang thiam turin a chah a; langtlang leh rintlak E-roll buatsaih tura Political Party te pawimawhzia sawiin political party te ruat Block Level Agent te pawh tangkai taka hmang turin CEO Dr Lalrozama chuan kalkhawmte a sawm a ni.

Election Commission of India in May 14, 2026 khan SIR neih tur thu a puan tak avangin chak takin hmalak nghal a ni a. Vawiin training hi chawhma leh chawhnu a then niin Jt CEO Pi Ethel Rothangpuii program a kaihruai a. Mamit Election Officer Pu Lalnunfela Chawngthu, RD Deputy Director Pu Lalthakima, Khawzawl Election Officer Pu Timothy R. Lalhmangaiha leh Assistant Commisioner/ACEO Pi F. Lalnisai ten kal khawmte an zirtir a ni.