Minister of State Pu B Lalchhanzova'n MZP Hqrs Lunglei buatsaih 'Mizo Zirlai ti tha chawimawina 2026 & Career Awareness' hun a hmanpui

Hnahthial Post | May 22, 2026, Aizawl: Vawiin khan Mizo Zirlai Pawl (MZP) Headquarters Lunglei te'n Saikuti Hall-a kum 2026 HSLC leh HSSLC Exam-a "Mizo Zirlai Ti Ṭha Chawimawina 2026 & Career Awareness" hun an buatsaih chu Land Revenue & Settlement (LR&S) Minister Pu B. Lalchhanzova chuan Khuallian niin a hmanpui.

Khuallian Pu B. Lalchhanzova chuan zirlaite zahna chibai bukin, zirna leh hma lam hun lo kal zel turah rilru put hmang dik a pawimawh thu leh mahni inrin ngam leh inpawm ngam a pawimawh thu a sawi a. Mahni inngaih nep leh mi dangin kan tih theih an rin loh pawh thei lo tura inngaih loh tur a ni tiin, Pathianin siam chhan min nei a, eng emaw tak ka la ni ve ang tih rilru pu chunga, hlawhtling tura beih ṭang ṭang a pawimawh, a ti a. Kum naupan avanga inthlahdah leh muanchan a pawi tiin, zirlaite chu puitlin zir a, tun aṭanga theih tawpa inbuatsaih turin a chah.

Minister Pu B. Lalchhanzova chuan harsatna hi remchang a ni a, harsatna pal tlang tam apiang an tlo va, anmahni aṭangin thu fing, zir tlak a chhuak ṭhin tiin, retheihna, rilru natna leh hun harsa leh khirh inhnehtir lo va, tum ruhna nen hma lam pan a, a ṭha lam um zel turin zirlaite a fuih a. Mahni intihrehawm ngamte, nawmna kalsan ngamte'n hlawhtlinna an chan ṭhin thu leh mahni intihhrehawm chu din chhuahna, pangchan chu eng mah nih lohna a nih thu sawiin, zirlaite chu pangchang leh no lutuk lo tur te, mahni inkhawngaihna rilru pu lo tur te, nu leh pate pawh mahni fate duat lutuk lo va, an hrehawm phal tur te'n a chah a. Lehkha zir nasat a ṭhat thu leh finna leh hlawhtlinna a nih thu sawiin, zirlaite chu ni khatah darkar 8–13 inkar tal zir turin a chah a. Tlawm duh lohna, tum ruhna leh nun uluk avangin mi an hlawhtling ṭhin tih sawiin, zirlaite chu chuti ang mi ni tur chuan a fuih a. MZP te'n zirlaite hmakhaw ngaia an hma laknaah lawm thu sawiin, duhsakna a hlan nghal.

He hunah hian Lunglei Municipal Council (LMC) Chairman Pu Lalzuithanga leh councillor-te, sawrkar official-te, MZP, MSU, YMA, MHIP, MJA leh political party hruaitute, zirlaite leh zirtirtute leh zirlai nu leh pate an tel a. MZP Headquarters Lunglei Vice President C. Lalsiamthara'n hun kaihruaiin, BCM Education Director Rev. RC Lalthanzama'n hunserh a hmang a. Secretary K. Lalchhuanawma'n MZP Headquarters Lunglei hma lakna report pein, President H. Lalhmingmawia'n zirlaite fuihna thu a sawi a. MZP General Headquarters ai awhin General Secretary C. Lalhmingsanga'n thu a sawi bawk.

He hunah hian Private Secretary to Minister & Under Secretary, LR&S Pu Remlalliana Hnamte, MCS chu resource person niin, zirlaite hma hun atana kaihhruaina leh kawng kawhhmuhna hun a hmang a. ECHS Polyclinic Lungleia Officer-in-Charge Maj. MS Dawngsanga (Retd) chuan zirlaite fuihna leh sipaia luh dan a sawi bawk a. Khuallian leh resource person-te bakah, LMC Secretary & DCSO Pu Lalremruata Sailo, MCS; Assistant Commissioner (Revenue) Pi Jennifer Vanlalhruaii Pachuau, MCS; Sub-Deputy Commissioner & Assistant Controller P&S Pi Lalnunchhani Hnamte, MCS leh Deputy Director & DIPRO Lunglei Pu C. Lalhruaitluanga, MIS te'n zirlaite zawhna chhangin, zirna, ei zawnna leh ni tin nuna zirlaite tana hriat tur pawimawh tak tak an sawi bawk.

Vawiina zirlai ti ṭhate chawimawina hun buatsaihah hian MZP Headquarters Lunglei huam chhunga zirlai ti ṭhate – HSLC & HSSLC 2026-a Top 10-a lang zirlai pathum te; 100% pass result nei zirna in 16 te; HSLC Distinction-a pass zirlai 77 leh HSSLC Distinction-a pass zirlai 38 (Arts-ah 30 leh Science-ah 8) te hnenah chawimawina thuziak hlan a ni a. HSLC 2026-a Mizoram puma 9-na LH Laltleipuii (d/o LH Lalbiakenga), Holy Faith School hnenah Pu Lalṭhazuala (Fam) te chhungkuain Lunglei aṭanga HSLC-a ti ṭha ber hnena an hlan ṭhin DENGRO Award (kum 2018 aṭanga kalpui) chu hlan a ni bawk a. Award hian tangkafai ₹10,000/- a keng tel.

HSLC & HSSLC 2026-a Top 10-a lang zirlai chawimawina hlante chu:

(1) LH Laltleipuii (d/o LH Lalbiakenga), Holy Faith School – HSLC-a 9-na

(2) K. Zomuanpuia (s/o K. Zohmangaiha), Baptist HSS – HSSLC (Science)-a 2-na

(3) HC Malsawmtluanga (s/o HC Lalsangvunga), Baptist HSS – HSSLC (Arts)-a 8-na.