Hnahthial Post | May 22, 2026, Hnahthial: Mizo Zirlai Pawl, Hnahthial Headquarters buatsaihin GSA Hall, Electric Veng-ah vawiin khan HSLC leh HSSLC-a zirlai tithate chawimawina hun hman a ni a. Legislative Assembly Speaker, Pu Lalbiakzama chuan khuallian ni a hmanpuiin South Tuipui Bialtu MLA, Pu Jeje Lalpekhlua’n chuan Khual Zahawm niin he hun hi a hmanpui bawk.
Khuallian, Pu Lalbiakzama chuan zirna leh hriselna chu bial hmasawnna atana a ngaihpawimawh ber a nih thu sawiin zirna chuan tawp in tai a neih loh thu a sawi a. Zirlai chu mi tumruh leh taima, mi theih ang ti ve thei, mite pawhin a an tum chhin ngai loh pawh tum ngam tur khawpa huaisen nih a tul thu a sawi a. Sawrkar Laipui hna hrang hrangah Mizote kan tling thei ta lo chu a vei thu sawiin UPSC mai ni lovin SSC te pawh Mizo zirlaite chuan exam ve thin se a duh thu a sawi a. Mizoten kan mamawh hunah chunga thawkte chu an tangkai thin avangin Central Service-ah lut thei tur khawpa tan la turin zirlate chu a chah a. Sawrkar hna kan hmu thei ta kher lo a nih pawhin kan thlen chinah a tha ber nih tum zel tura zirlai kalkhawmte chu fuihin hnahthawktu zahawmna chu a hnathawh hniam leh san aiin a thawktu thawhrimna leh rinawmnaah a innghat zawk a ni tih hre reng turin a duh thu a sawi a ni.
Speaker chuan zirlaite chu phone leh social media an khawih a nih pawhin tunlai thiamna, a bikin AI chu zirchiang a, hmang tangkai turin a chah a. Zirna chu kawng engkima mi hmantlaka min siamtu a nih avangin thlahthlam lo tur leh tum ti sang a, teirei peih tura chahin, eng kawng pawh zawh se an nih theih chinah chuan a tha ber ni zel turin a chah nghal a ni.
Khual Zahawm, Pu Jeje Lalpekhlua chuan thu sawiin he huna chawimawite chu Mizoram pumpuia Hnahthial min tihmingthatute an nih thu a sawi a. He huna zirlai kalkhawmte chu an zirnaah theihtawp chhuah theuh tur leh Hnahthial tihmingthatu, a khaw mi nih tinuamtu ni theuh turin a chah a. Thawhrimna tel lo chuan thiamna ringawt chuan a daih rei loh thu sawiin hlawhtlinna tawng baw tur chuan harsatna paltlang a tul thu a sawi a. Hlawhtlinna kan lo chang a nih pawhin mi harsa zawkte leh thenrual thate leng ve lo khawpa mi hlawhtling ni lo tura zirlaite chu chahin eng dinhmunah pawh awm se, mahni chawr chhuahna chu theihnghilh ngai lo turin a chah a ni.
District Education Officer, Pu Micky Lalenkawla chuan thu sawiin tuna zirlai chawimawite chu a lawmpui rualin a kakpui an thleng chiah a ni tih hre tura a duh thu a sawi a. Tuna atanga kum rei lo te ah eng ang mi nge an nih a, chawimawi tlak an nih leh nih loh chu a rawn lan tur thu a sawi a. Thiamna hmantlak tak tak nei tura chahin kan thiltih chu thinlung leh tihtak zeta kan tih chuan mi chhenfakawm tak kan nih zel tur thu a sawi a ni.
He zirlai thitha chawimawina programme-ah hian Lalramluahpuii d/o C.Lalduhawma, Chanmari Veng, Hnahthial chu HSSLC (Science Stream) ah Mizoram puma pangana a nih avangin MLA Award hlan a ni a. Hnahthial District chhung school-a kal, HSLC exam-a zirlai titha sawm leh pakhat (11) leh HSSLC exam-a zirlai titha sawm (10) te chu chawimawina thlipek hlan an ni a. Hnathial pawna lehkha zir, HSLC leh HSSLC Distinction-a pass zirlai pariat (8) te bakah Hnahthial District chhunga zirlai pass kim nei School pasarih (7) te hnenah chawimawina thilpek hi hlan a ni bawk.
