Hnahthial Post | May 22, 2026, Hnahthial: Vawiin khan Hnahthial DC Meeting Hall No– II ah Electoral Registration Officer (ERO) leh Addl DC ni bawk, Pu Zothanmawia Khiangte kaihhruaiin tlawmngai pawl hrang hrang - YMA, MHIP leh MUP –te bakah MJA member leh political party block hruaitute tan Special Intensive Revision (SIR) chungchanga hriattur pawimawh inhrilhhriatna hun hman a ni a. ERO chuan SIR chu Electoral Roll (e-roll) thianghlim leh felfai kan neih theihna hun remchang tak a nih avangin roll felfai neih a nih theih nan he huna kalkhawmte chu thawhho puiah a sawm nghal a ni.
ERO chuan e-roll a awm sa kha SIR-ah chuan rin a nih tawh dawn loh thu sawiin hetianga Intensive Roll Revision neih hnuhnun ber chu kum 2002-2004 khan a nih thu a sawi a. BLO-te chuan in tinah Enumeration Form sem a, an va khawn leh vek a tul tawh tur thu sawiin chu Enumeration form lakkhawm atang chuan draft roll siam a nih tur thu a sawi a. Tun dinhmunah hian Mapping-ah 15% vel hi e-roll a chuang lo an awm thu tarlangin chung ho bakah enumeration form fill up loh vang emaw, thil dang engemaw vanga draft roll-a awm lo te tan Hearing neih a tul tur thu a sawi bawk.
ERO chuan tun thutkhawmna a kohkhawmte chu khawtlang mi leh sa hrechiang tura an ngaih, e-roll felfai tak neih a nih theih nana mi pawimawh tak tak te an nih thu a sawi a. Tupawh kan hriat rei tawh vang emaw, kan khawngaih vang emaw ringawta e-roll a thun theih an nih loh thu sawiin dan ang taka e-roll a thun theih loh chu hum tlat lo turin a chah a. A hma a e-roll a lo chuang tawh, chuang tur ni si lo, paih ngaite pawh sawi hreh loh turin a chah nghal a ni.
Assistant Electoral Registration Officer (AERO), Pu Lawrence Lalhlanthara chuan Enumeration form chungchang sawifiahin In tinah copy hnih sem a nih tur thu a sawi a. BLO –ten an Inah vawi thum khawn tuma an kal hnu pawh a an awm loh chuan Draft roll-ah ziahluh an nih theih dawn loh avangin kalkhawmte chu mipuite hnenah he SIR pawimawhna chu lo hrilh darh turin a chah a ni.
Tags
News