Hnahthial Post | July 8, 2026, Aizawl: Vawiin khan Conference Hall, Directorate of Agriculture & Farmers' Welfare-ah Agriculture & Farmers' Welfare Department hnuaia scheme hrang hrang hmalakna thlirletna hun ‘Review Meeting’ neih a ni a. He hun hi Agriculture & Farmers' Welfare Minister Pu P.C. Vanlalruata chuan khuallian niin a hmanpui a ni.
Khuallian Pu P.C. Vanlalruata chuan thu sawiin, Agriculture Department hnuaia thawktute thawhrimna zarah Agriculture Department hmel a mawi tawh hle a ni, a ti a. Mizoramah Green Revolution a thlen ve theih nan kalkhawmte chu ṭan la turin a chah a, "Hnathawhnaah mahni mawhphurhna chu 100% kan pe thei lo a nih pawhin, 90% tal pe thei turin ṭan kan lak a ngai a ni," a ti bawk. Minister chuan department hnuaia scheme tam tak neihte tihlawhtling tura rinawm leh thahnemngai taka mipuite tana thawk chhunzawm zel turin thawktute a chah a; hmasawnna tluantling a awm theih nan hmun hrang hranga scheme kalpui dan enfiah reng a pawimawhzia leh sawrkar hnathawkte chu loneitute kaihruaitu an nih ngei a ṭul thu a sawi a. Thlai tharah hma kan sawn viau rualin, loneitute tan 'Value Addition’ kalpui chhoh zel a ṭul thu a sawi tel bawk.
Review Meeting hi A&FW Department Secretary Pi Ramdinliani chuan kaihruaiin, kum 2025-26 chhunga District Agriculture Officer te hmalaknahrang hrang bakah SAS, Hnahthial, Krishi Vigyan Kendra (KVK), Crop Production Programme, Price Support Scheme, Mizoram Agriculture Marketing Board (MAMB), Green-Ag leh TRIBES hnuaia hmalaknate a sawi a. July ni 9 hian Centrally Sponsored Scheme leh Central Sector Scheme hnuaia Department hmalakna hrang hrang leh 2026-27 chhunga hmalak dan tur Annual Action Plan sawiho leh tur a nih thu a sawi bawk a ni.
A&FW Director Pi Vanramthangi chuan thu sawiin, agriculture sector hi Mizoram ṭhanna kawngah a pawimawhzia a sawi a. Buh leh thlai dang tharchhuahna kawngah ṭan lak a ngai hle tih sawiin, scheme hrang hrangte ṭangkai taka hmang turin kalkhawmte a fuih a ni. Pulses, oilseeds leh thlai chi ṭha sem chungchângah loneituten hma an lak ṭhat theih nan an harsatna neihte enpui a, hriatpui vek turin thawktute a chah. Hnathawh zawng zawng ṭha taka 'Documentation' neih a pawimawhzia leh hlo tûr leh lei tihṭhatna pek dan dik chungchângah inzirtirna ṭha zawk neih a ṭul thu a sawi bawk.
Review Meeting-ah hian Agriculture & Farmers’ Welfare Department hnuaia Secretariat, Directorate, District leh Block-a thawktu hrang hrang bakah Agriculture & Farmers’ Welfare Department hotute leh mi pawimawh dangte an tel a.
He hun hi Agriculture & Farmers' Welfare Department Additional Director Pu B. Ramnunsanga chuan lawmthu sawiin a khar a ni.
Tags
News