Champhaiah hmeichhe naupang chawikan nana duan Project Thaichhawni Nu tlangzarh

Hnahthial Post | July 8, 2026, Champhai: District Programme Officer, Women & Child Development, Social Welfare & Tribal Affairs Department, Champhai te buatsaih, Project Thaichhawni Nu chu vawiin khan I&PR Auditorium-ah Champhai District Bawrhsap Pu Mohammad Aaquib chuan a tlangzarh.

Bawrhsap chuan thu sawiin Project Thaichhawni Nu hming hi IAS exam tura a inbuatsaih lai atang tawha a lo hriat ve tawh thu a sawi a, he project hi zirlai naupangte tan a pawimawh zia a tarlang a, Thaichhawni nu in a fanu tana a inpekna te khan vawiina nu te tan chona nasa tak a pek thu a sawi a, he project kaltlang hian hmeichhe naupangten hma hun duhawm tak an neih ngei a beisei thu a sawi a, hmeichhe naupang chauh ni lovin mipa naupang thleng pawhin naupangte an nih atanga pawisa khawlsak a pawimawh tih sawiin SSY hnuaia pawisa lo khawlsak hian zirna sang zawk an thlen hunah an tan hlu tak a ni tawh dawn tih a sawi a, kum 18 an nih atangin an lachhuak thei a, hei hian zirna kawnga harsatna tam tak an tawhna turah a veng dawn a ti a, he Project Thaichhawni Nu hi a hawng a ni.

He hun hi Pu Lalnunfela, DPO chuan kaihruaiin Pi K. Lalrinfimi hnen atangin Thaichhawninu Project tlangpui ngaihthlak a ni a, Pu Lalthlamuana Tochhawng, SDEO leh Pu C. Vanlalzawma, Sub-Post Master te hnen atangin thusawi ngaihthlak a ni bawk.

Sukanya Samriddhi Account (SSA) emaw Sukanya Samriddhi Yojana (SSY) tih hi 2015 kumah Beti Bachao Beti Padhao (BBBP) campaign hnuaiah India sorkarin a din a, hmeichhe naupangte tan sum dahna ngaih pawimawh chungchang zirtir te, hmeichhia naupangte zirna leh an hma lam hunah sum mamawhna lo awm tur atana lo buatsaih te, nu leh pate leh enkawltute'n an fanu tan rei tak chhung sum an dah theih nana fuih te chu a tum ber a ni. SSY account hi India Post Office zawng zawngah hawn theih a ni a, Bank thenkhat (public leh private) ah pawh hawn theih a ni a, Mizoram-ah chuan Post Office leh State Bank of India (SBI) ah hawn theih a ni a, Champhai ah SSY hnuaiah Account 956 hawn a ni tawh a ni.

Project hming "Thaichhawni Nu" tih hi Mizo hla leh thawnthu lama Thaichhawni Nu hming atanga lak a ni a, he Project hian hmeichhe naupangte hmalam atan sum dahsak a, an zirna leh nupui pasal nei hnu mamawh atan sum awmsa siam te, BBBP programme angin hmeichhia naupangte chu sum dahna hmanga anmahni dinhmun tih chak zawk te, Nu leh pate rilru siamthat a, "fanu tan sum dah hi pawimawh a ni" tih hrehtir leh thla 10 chhungin kum 10 hnuailam hmeichhe naupang 4,050 te SSY scheme-ah luh tirte chu a tum tlangpui a ni.

Project Thaichhawninu hi Women & Child Development Department leh India Post Office te thawhhona project a ni.