Lawngtlai Deputy Commissioner-in CADC CEM thar lalut

Hnahthial Post | July 8, 2026, Lawngtlai: Vawiin khan 11th Chakma Autonomous District Council (CADC) - a Chief Executive Member (CEM) thar lakluh inkhawm chu CADC Art & Cultural Hall, Kamalanagar-II ah neih a ni a. Pu Pronit Bikash Chakma, Executive Secretary, CADC chuan lakluh inkhawm hi kaihruaiin, Lawngtlai bawrhsap Pu Donny Lalruatsanga chuan rinawmna thutiam lak tirin Pu Nirupam Chakma chu Chief Executive Member (CEM) atan a lalut.

Pu Pronit Bikash Chakma, Executive Secretary, CADC chuan CEM atan Pu Nirupam Chakma ruatna 'Sawrkar Notification' chhiarchhuahna nei a. Hemi hnu hian Lawngtlai bawrhsap Pu Donny Lalruatsanga chuan rinawmna thu (Oath of Office & Secrecy) tiam tirin Pu Nirupam Chakma chu 11th Chakma Autonomous District Council (CADC) Chief Executive Member (CEM) atan a lalut nghal a ni.

Thusawiin Pu Nirupam Chakma chuan CADC- a sawrkar mumal leh ngelnghet tak awm tura hma latute, Mizoram Governor, Chief Minister, DCMA changtu Minister leh Chakma Democratic Alliance Legislature Pary - te chungah lawmthu a sawi a. CADC - ah huapzo, langtlang leh mipui sawrkar din tura hmalak a nih tur thu a tarlang a. Hmasawnna kawng hrang hrang- Zirna, Kawlphetha, kawngpui tha, thalaite tana hna thar siam leh a dangte ngaihpawimawh a nih tur thu a sawi. Pu Nirupam Chakma chuan CADC hmasawnna turin a kaihhruai sawrkarin theihtawp a chhuah tur thu intiamin, hemi kawngah hian thahnem ngai taka sawrkar tawiawm turin CADC huamchhunga VC, Tlawmngai Pawl, Kohhran leh mipuite a sawm nghal bawk.

DC & MA Minister Pu C. Lalsawivunga chuan rei tak Governor's Rule - a an awm hnua, CADC - ah sawrkar thar lakluh a ni chu lawmawm a tih thu a sawi a. Governor leh Chief Minister - te hmalakna fakawm a tih thu tarlangin, Chakma Democratic Alliance Legislature Party chuan CADC tan hmasawnna thar a thlen a beisei tlat tih a sawi a. Hmasawnna tluantling, mipuite innghahna leh mipui sawrkar ni zel tura sawrkar thar chahin, mipuite duhsakna a hlan nghal a ni.

CADC- ah hian Elected Seat - 20 awmin, Chakma Democratic Alliance Legislature Party - ah hian BJP - 10 leh ZPM - 9, infinkhawmin sawrkarna hi an siam a ni.

Vawiin CADC CEM thar lakluh inkhawmah hian Pu C. Lalsawivunga, Minister for District Council & Minority Affairs, Pu Devesh Kumar, Bihar Legislative Council, Ex- MLA, MDC, Ex- MDC, Sawrkar Official, Polictial Party hotute leh mi pawimawh dang eng emaw zat an tel a ni.