Hnahthial Post | July 9, 2026, Hnahthial: Vawiin chawhma khan DC Meeting Hall, Hnahthial-ah Electoral Roll Special Intensive Revision (SIR) kalpui mek-a 29-South Tuipui Assembly Constituency Observer Pi Lalzarmawii, Secretary, Social Welfare, Women & Child Development Department hovin meeting neih a ni a. He hunah hian Hnahthial District chhunga Election Official-te, BLOhte, Party aiawhte, NGO hruaitu aiawhte, Hnahthial Kohhran Joint Committee aiawh leh MJA member-te an tel a ni.
Meeting hi Pu Zothanmawia Khiangte, Electoral Registration Officer, Hnahthial chuan kaihruaiin Electoral Roll Observer, Pi Lalzarmawii chuan kalkhawmte hnenah thu sawina hun a hmang a. SIR 2026 hmalaknaah Hnahthial District chuan hna an thawk tha a tih thu sawiin DC leh a thawhpuite bakah BLO leh thawktu dang zawng zawngte chungah lawmthu a sawi a. Draft Electoral Roll-a la chuang ve lo, khua leh tui dik tak, kum tling tawhte chu an chuan vek theih nan NGO, kohhran leh MJA hruaitute chu Election office nen tha taka lo thawk zel turin a sawm nghal a ni.
Hnahthial Election Officer, Pu S. Kaptluanga chuan SIR, 2026 kalpui a nih hma khan 29-South Tuipui A/C ah electors 16,478 leh Polling station sawmhnih parsaih (27) an awm thu a tarlang a. SIR kalpui a nih hnuah Polling Station pakhat siam belh niin sawmhnih pariat (28) a awm tak thu leh Enumeration Form sem chhuah atanga Digitized theih hi electors 15,443 an awm thu a tarlang bawk.
Kum 2005 a anmahni emaw, an thlahtute emaw chuang lo mi 1183 awmin heng mite hian ERO/AERO hmaah hearing an neih a ngai dawn a ni.
Draft roll a hming chuang lo emaw, siamthat duh emaw nei tan July ni 4, 2026 atanga ni August ni 4, 2026 thleng Claims & Objection period hawn a ni a. He hun chhung hian roll-a inthun thar duh leh siamthat ngai neite chuan BLO-te hnenah Form lak chhuah tur niin an hnenah submit leh tur a ni a. Final Electoral Roll hi September ni 6, 2026 ah tlangzarh tura ruahman a ni.
Tags
News