Hnahthial Post | July 9, 2026, Aizawl: A hnuaia tarlan ang hian Mizoram Police chuan tunhnaiah ruihhlo leh dan phal loh thil engemawzat a man:
1. Ni 8 July 2026 khan Saitual Police Special Team-te chuan Kualmawi Check Gate-ah lirthei endikin, TATA truck (AS01SC5973) pakhat chu an lo tiding a. Lirthei khalhtu hi tlanchhe nghalin, reilote chhung um a nih hnuah man a ni.
Damdawi heroin ni ngeia hriat, gram 102 a rit, he lirthei chhunga thuhruk chu lirthei khalhtu Fulchand Ali Mondal (35), Dhubri District, Assam-a mi kut atang hian man a ni. Heng ruihhlo hi sahbawn bawm 9-ah pack niin, cheng nuai ₹20.40 vel man hu a chhut a ni. Thubuai ziah luh niin, chhui zui hna thawh mek a ni.
2. Ni 7 July 2026 zan khan, Champhai Police Special Task Force-te chuan Champhai pan mek Bolero Maxx (AS-01-TC-8784) pakhat chu rinhlelh thilah an lo tiding a. He motor hi Rajiv Hussein Laskar (26)-an a khalh a, Jinuk Uddin Laskar (30) a tel bawk a, anni pahnih hi Silchar, Assam lam mi an ni.
Uluk taka lirthei hi dap a nih hnuah Manta Ray/Mobula samkhuih (gill plates) ro nia hriat, ip 9-a khung, kg 210 vela rit thuhruk chu an hmu chhuak a ni. Heng an thil mante hi international black-market-ah chuan ₹2.30 crore vel zeta hlu tura chhut a ni a, Mizoram chhunga hetiang thil man tam ber tum nia ngaih a ni.
Heng an thil mante hi Wildlife Laws hnuaia humhalh tlat an nih avangin, thil man, lirthei leh a phurtu mi pahnihte chu Divisional Forest Officer, Champhai Forest Division hnenah dan anga hma lak zui turin hlan an ni.
3. Ni 7 July 2026 khan, Zokhawthar atanga Aizawl pana tlan Tata Sumo pakhat chu lo dan a ni a. Motor an dapnaah hian heroin nia hriat, gram 26 a rit chu hnunglam thutna hnuai bel (pot) pakhata thuhruk chu hmuh a ni a, he thil hi Lalrinchhana (20) s/o Lalrinmawia, Khawmawi, Myanmar-a mi ta a ni.
4. Ni 6 July 2026 khan, Zokhawthar Police-te chuan Zokhawthar atanga Aizawl pana tlan Maxi Cab Sumo pakhat chu lo tidingin, heroin nia hriat gram 48 chu motor-a chuang pakhat Thuanmawia (42) s/o Sunliana (L), Tshambhari Village, Falam District, Myanmar (P/A Tiau, Khawmawi, Myanmar) ipte (sling bag) atangin man a ni.
5. Ni 6 July 2026 khan, Aizawl District Special Branch (DSB) leh 34 Assam Rifles- te chuan joint operation neiin, Lawipu, Aizawl-ah methamphetamine nia hriat, kg 1.955 a rit, vaibelchhia ₹1.60 vel zeta hlu chu Marcus Lalvenpuia (19), Luimawi Village, Mamit District-a mi kut atangin an man. Aizawl Police Station- ah NDPS Act hnuaiah thubuai ziah luh nghal a ni a, chhui zui hna thawh mek a ni.
6. Ni 5 July 2026 khan, Champhai Khankawn Police Check Gate-a thawktute chuan an tihdan pangngaiin tank lorry (AS-07-C-5431) pakhat an lo endik a, Myanmar atanga dan lova lakluh nia hriat kuhva ro (dry areca nuts) kg 2,960 a rit, ₹10.36 lakh vel zeta hlu chu an man a ni.
He thil phurhna tur hian motor khalhtu hian lehkha pawimawh (valid documents) engmah a neih loh avangin, dan lova lakluh ngei nia hriat a ni a. Motor leh kuhva mante hi Customs Preventive Force, Champhai hnenah dan anga hma lo la zui turin hlan an ni.
Tags
News