Hnahthial Post | July 3, 2026, Aizawl: Vawiin khan Mizoram Sawrkar, Mizoram State Legal Services Authority (MSLSA) leh Judicial Academy, Assam tangkawpte chuan Aijal Club-a R.B. McCabe Hall-ah India dan thar pathum(Naveen Nyaya Sanhitas)- Bharatiya Nyaya Sanhita, Bharatiya Nagarik Suraksha Sanhita leh Bharatiya Sakshya Adhiniyam chungchang zirhonan 'State Level Conference-cum-Joint Refresher Course' an buatsaih a. Home Minister Pu K. Sapdanga chuan khuallian niin he hun hi a hmanpui a ni.
Khuallian Pu K. Sapdanga chuan thu sawiin, hun inher chho zêlah hian organized crime leh technology hmanga thil sual tihna a pun zel avangin, India dan thar pathumte chu mipuite ngai pawimawh lehzual zawk(citizen-centric), rang zawka che chhuak thei, hun mamawh ang zela hmasawnna ruhrel leh theihna tihpun nan(Infrastructure leh capacity building), science leh technology hman tangkai lehzual nan leh tunlai khawtlang mamawh phuhhrûkna turin India ram chhung criminal justice system siamthatna tura duan a ni, a ti a. Amaherawhchu, Minister chuan dan siamthat hlawhtlinna chu mipui leh dan kengkawhtuten Naveen Nyaya Sanhita an hriatthiam dan(interpretation) leh kenkawh anih danah a innghat a ni tih sawiin, kalkhawmte chu vawiin programme hi hlawk leh tangkai taka hmang turin leh kan criminal justice system tihchakna kawngah thawhhlawk lehzual tura thawhhona tha nei a, mipuite chanvo leh dikna an humhalh theih zel nan duhsakna a hlan bawk.
Vawiin programme hi then hnih a hman a ni a. A then khatna hi hawnna inkhawm niin, Law & Judicial(L&J) Department-a Finance & Accounts Officer Pi Emily Lalnunthari Ralte in a kaihruai a. Home Secretary Pu Vanlalmawia'n kalkhawmte lawmna thu a sawi a; Gauhati High Court(GHC), Aizawl Bench-a Registrar leh High Court Legal Services Committee-a Secretary ni bawk Dr. HTC Lalrinchhana chuan lawmthu sawiin hawnna inkhawm hi a khar a ni.
Hawnna inkhawm zawhah hian Technical Session leh dan tharte chungchang sawihona hun(Interactive Session) hman leh a ni a. He hun hi GHC,Aizawl Bench-a Joint Registrar ni mek Pi Cacy Malsawmtluangi Ralte leh L&J Department Deputy Secretary Pi Annette Lalrinsangi ten an kaihruai a. Assam Judicial Service(AJS) Officer leh Judicial Academy, Assam-a zirtirtu ni bawk Pu S.P. Moitra leh Pu Bhupen Kumar Nath, SP (Cyber Crime) Pu Zonun Sanga leh SP(CID Crime) Pu Gaurav Tyagi te chuan dan thar pathumte sawifiahin a kenkawh dan chungchangah zirtirna an pe a. MSLSA Member Secretary Pu Vincent Lalrokima chuan Valedictory Address sawiin he hun hi a khar a ni.
Vawiin programme-ah hian General Administration Department-a Executive Magistrate-te, GHC Aizawl Bench-a Judicial Officer-te, National Informatics Centre official-te, Government Advocate-te bakah Home, Health & Family Welfare leh L&J Department-a official thawkte thahnem tak an tel a ni.
Tags
News