Hnahthial Post | July 3, 2027, Lawngtlai: Vawiin khan Lawngtlai District Football Association (LDFA) buatsaihin Lawngtlai XI leh Mizo Professional Footballers' Association (MPFA) ten CYLA Playground - ah Rualbanlote pualin 'Charity Football Match' an khel a. Dr. Lorrain Lalpekliana Chinzah, Adviser to Chief Minister ( H&FW, A&FW) leh Lawngtlai East bialtu MLA nibawk; South Tupui bialtu MLA leh President, MPFA nibawk Pu Jeje Lalpekhlua leh Lunglei North bialtu MLA leh Lunglei High Powered Committee (HPC) Vice Chairman nibawk Pu V. Malsawmtluanga chuan a hmunah telpui a. Lawngtlai bawrhsap Pu Donny Lalruatsanga chuan a tawiawm bawk a ni.
Dr. Lorrain Lalpekliana Chinzah chuan kalkhawmte chibai bukna neiin, tanpui ngaite tanpuina tura LDFA ten inkhel an buatsaih chu lawmawm a tih thu a sawi a. MPFA leh Lawngtlai XI- te chu vawi tam tak Mizoram tihmingthatu an nih tawh angin, thalaite tan entawn tur tam tak a awm tiin, anmahni atanga zirchhuah nei ngei tur turin a fuih a. Football hmanga eizawng thin an ni a, an nunah entawn tur a tam hle a, an insumtheihna, thawhrimna, tumruhna leh Ruihhlo laka an fihlimnate chu chhuanawm a tih thu tarlangin, thalaite leh mipuite pawhin entawn thiam a tul hle a ti a. Dr. Lorrain Lalpekliana Chinzah chuan Charity Match - hlawk taka khel turin players - te duhsakna a hlan nghal bawk.
Pu Jeje Lalpekhlua chuan Charity Match - khel tura MPFA- te sawm an nih kawngah lawmawm a tih thu sawiin, kalkhawmte chibai bukna a nei a. MPFA- chu kum 2010 din a nih thu tarlangin, Football hmanga eizawn tum tan te, Naupang zawkte kawng kawhhmuhtu leh Football chawisan kawnga Mizoramin hmasawnna a neih theih nana din a nih thu a sawi a. Football hmanga eizawn tumte chu MPFA- hruaitute hnen atanga thutawn la fo thin turin a chah a. MPFA - ten theih ang anga 'Charity Match' an lo neih fo tawh thin thu sawiin, heihi mipuite hnena an lawmna an lanchhuah tirna a ni tih sawiin, Pu Jeje Lalpekhlua chuan hmalam hunah pawh theihtawp an chhuah zel tur thu a sawi a ni.
Pu V. Malsawmtluanga, Lunglei High Powered Committee (HPC) Vice Chairman, leh Lunglei North bialtu MLA nibawk chuan Lunglei mipuite aiawha LDFA, MPFA leh Lawngtlai mipuite chibai a buk thu a sawi a. Sawrkarin 'Sports' a ngaipawimawh hle tih tarlangin, infiammite tan kawng hrang hrangin hma a la reng a ni, a ti a. Empowering Mizoram Sports (EMC) kalpui mek a ni tih sawiin, Infiamna kawng hrang hrangah 'Basic Coaching' pek an ni dawn a, infiammiten rahbi thar an kai theih nan hmalak mek a ni tiin, hmalam huanah pawh theihtawp chhuah a nih tur thu a sawi.
Pu Donny Lalruatsanga chuan 'Charity Match' entura lo kalte, Players leh LDFA - te chungah lawmthu a sawi a. Rualbanlote puala MPFA leh LDFA- te an luanchhuahna fakawm a tih thu tarlangin, District Administration chuan an kal zelna turah duhsakna a hlan tih a sawi a ni.
Vawiin hun hmanna hi Pu C. Hrangthianga, President, LDFA chuan kaihruaiin, Pu Joseph Lalhmingthanga Chinzah, Hon' Secretary,LDFA chuan report a pe a. 'Charity Match' khelh hi ngaihlutu tamin, entu mipui thahnem tak an awm a. MPFA Awards - semna neih nghal a ni bawk.
Tags
News