Hnahthial Post | July 3, 2026, New Delhi: New Delhi-a cham mek Pu Lalnghinglova Hmar, Minister of State (i/c), Labour, Employment, Skill Development & Entrepreneurship Department leh Pu Jatin Ram Manjhi, Union Minister for Micro, Small & Medium Enterprises (MSME) te chu nizan khan New Delhi-a Union Minister chenna inah an inkawm a, MSME kaltlanga Mizo thalaite hmasawnna tur hrang hrang an sawidun.
LESDE Minister Pu Lalnghinglova Hmar chuan Mizorama enterprise tam zawkte chu MSME hnuai an nih thu sawiin, Mizo thalai engemawzatin eizawnna’n an hmang tih Union Minister a hrilh a. “Mizoram chu mihring awm zat atanga chhut a thalai hnathawk rual tamna, MSME lama nasa zawka tan lakna tlak a ni a. Mizoram sawrkar flagship policy ‘Bana Kaih (Handholding)’ hnuaiah pawh MSME kaihhnawih hmalakna tamtak a tel a ni.” a ti.
Meeting-ah hian skill development lama hmunpui tur, Mizorama MSME Technology Centre din chungchang sawi dunin, state sawrkar atanga thehluh tulte tihfel hunah hma a lo lakpui tur thu MSME Minister chuan Mizoram LESDE Minister a hrilh a. Thalaite tana Mizoram sawrkar hmalaknate chu lawmawm a tih thu sawiin, Ministry of MSME atanga puih theihna a awm chuan a inhawng reng tih a sawi bawk a ni.
Nimin vek khan Tourism Minister ni bawk Pu Lalnghinglova Hmar leh Pu Suman Billa, Addl. Secretary, Ministry of Tourism te chu Mizorama tourism project kalpui mek leh project thar thehluh tur chungchang sawiin an inkawm a. State pawn atanga tourist lo kalte chu Mizorama rei zawk cham tur leh, hmun tam zawk an tlawhna tura hmalak dan tur an sawi dun.
Sports Minister ni bawk Pu Lalnghinglova Hmar hian vawiin khan Pu Shyama Prashad Roy, Joint Secretary, Ministry of Minority Affairs leh official dangte pawh kawmin, MoMA hnuaia Mizorama sports project hrang hrang dinhmun an thlirho a. Chak zawka hna thawh a nih theihna’n Ministry leh state department-a hmabak awmte sawiho in, a tul angin hma an la nghal a ni.
Tourism lama hmasawnna tur leh hemi kawnga thawktute training-na tur chungchangah India Tourism Development Corporation Chairman Pi Mugdha Sinna nen an inbiak bakah; Ministry of Sports and Youth Affairs Joint Secretary Pu Vineel Krishna nen Mizorama sports hmasawnna tur hrang hrangte an sawi bawk a ni.
Tags
News