Mizoram Youth Commission hnuaiah Nail Technician Training Programme hawn a ni

Hnahthial Post | July 8, 2026, Aizawl: Vawiin khan Mizoram Youth Commission chuan Mizo thalaiten eizawnna tlak thiamna an neih theihna tur atana an buatsaih, a thlawna 'Nail Technician Training' programme chu MYC Auditorium, MINECO, Khatla-ah an hawng a. MYC Chairman Pu Malsawmzuala Ralte chuan he hun hi a hmanpui a ni.

Pu Malsawmzuala Ralte chuan thu sawiin, tunlai nunphung inthlak zelah beauty and wellness industry mamawhna a nasa lehzual tih tarlangin, he mamawhna phuhruk tur leh Mizoram thalaite tana mahni kea dinchhuahna (self-employment) siamsak nan he training programme hi duan a nih thu leh eizawnna nghet an neih theihna tura ruahman a nih thu a sawi a. Training turte chu an kal zelna turah duhsakna a hlan bawk a ni.

Nail Technician training tur hian mi 54 thlan an ni a. Training Programme hi batch hniha kalpui tur niin, batch pahnih te hi thla khat ve ve an training dawn a. Vawiin atangin batch hmasa zawk te hi training tan tur niin, batch hnuhnung zawk te hian August ni 3, 2026 atangin training an tan ve thung dawn a ni.

Training tura thlan thalaite hi tha taka kal tura beisei niin, attendance zaa sawmriat chunglam nei chin te chu MYC-in eizawnna bul an tanna atan an mamawh tur hmanraw chi hrang hrangte a pe (handhold) dawn a ni.