Lunglei HPC Vice Chairman Pu V. Malsawmtluanga'n Manipur-ah YPA General Headquarters huaihawt "Tangmai Festival 2026" a hmanpui

Hnahthial Post | Aug 10, 2026, Aizawl: August ni 8, 2026 (Inrinni) khan Young Paite Association (YPA) General Headquarters huaihawtin 9th Tangmai Festival 2026 (Fanghma Kut) chu YPA GHQ Hall, Hiangtam, Lamka, Churachandpur, Manipur-ah hman a ni a. Lunglei High Powered Committee (HPC) Vice Chairman Pu V. Malsawmtluanga, MLA chuan Khual Zahawm niin a hmanpui.

Pu V. Malsawmtluanga chuan Zo hnahthlak hnam hrang hrangte chu unau kan nih thu sawiin, hnam hrang hrangte chu inrem tak leh lungrual taka awm turin a chah a. Zo hnahthlak hnam hrang inkara harsatna awm ṭhin chu hmasawnna tikhaihlaktu leh ṭhalaite hma hun atana nghawng ṭha lo tak siam thei a nih thu sawiin, pawi a tih thu leh tawp tawh se a tih thu a sawi a. Zo hnahthlak hnam hrang hrangte chu ṭhalai leh naupang zawkte hmakhua ngai taka khawsa tura chahin, tlang mi MLA-te leh pawl hruaitute chu Manipur-a Zo hnahthlak unaute him tak leh ralmuang taka an khawsak theih nana hma la zel turin a chah bawk.

"Unity Through Culture and Tradition" tih thupui hmanga Kut hmannaah hian Young Mizo Association, Hmar Youth Association, Kuki Khanglai Lompi leh Paite Cultural Society te'n hnam lam chi hrang hrang an entir a. Mizoram aṭangin Esther Hnamte leh Ruatpuii te zaiin, Paite Zai-Awi Pawl (PZP) member zaithiamte an zai bawk.

He Kutah hian fanghma ei ho a nih bakah, man tlawm zawkin fanghma hralh chhuah a ni a. Chawhnu lamah concert buatsaih chhunzawm a ni bawk.