Khawzawlah National Wildlife Week-2026 puala buatsaih Volleyball tournament spike off neih a ni

Hnahthial Post | Oct 6, 2026, Khawzawl: Nizan khan National Wildlife Week-2026 puala Khawzawl District Volleyball Association, Khawzawl Wildlife Division leh Khawzawl Forest Range te tangkawpa buatsaih volleyball tournament hawnna hun (spike-off) neih a ni a. Khawzawl District chhunga volleyball team hrang hrang 10 te he tournament ah hian an tel dawn a ni.

He spike-off hi Pu Lalchhanchhuaha, President, KDVA chuan kaihruaiin, Pu PC Rosiama, Honorary Wildlife Warden, Khawzawl District chuan thuchah tawi a sawi a. Nungcha leh ramngaw humhalh tura intiamna (pledge) sawi rualna hun Pu George Lalngilneia, RO, Khawzawl Forest Range kaihhruaiin neih a ni bawk.

Pu Lalnunthanga, DFO, Khawzawl Wildlife Division chuan thuchah sawiin tournament spike-off hun a hmang a. Dan bawhchhia mante chungah ngaihnathiamna awm lova hremna lek a nih thin tur thu DFO, Khawzawl Wildlife Division chuan a sawi. Hemi hnu hian team intum tur te tie draw neih chhunzawm nghal a ni bawk.

He tournament hi ni 5 chhung khelh tur niin, October 10, 2026 (Friday) ah final khelh a ni ang. He National Wildlife Week chhung hian awareness campaign hmun hrang hrangah neih tur a ni a. Nungcha leh ramngaw venhim hna pawh ngawrh lehzuala thawh tum a ni.