Hmeichhiate chungchang Dan leh Hrai Zirhona Hun hman a ni

Hnahthial Post | Oct 6, 2026, Aizawl: Vawiin khan Mizoram State Legal Services Authority leh All Mizoram Women Federation tangkawp buatsaihin, I&PR Conference Hall, Lianchhiari Runah, Hmeichhiate chungchanga Dan leh Hraite Zirhona hun (Sensitisation on Women-centric Laws) hman a ni a. He hun hi Justice Helen Dawngliani, Additional Judge, Guwahati High Court chuan khuallian niin a hawng.

Hawnna hunah hian Khuallian Justice Helen Dawngliani, Addl. Judge, Guwahati chuan thusawiin, Hmeichhiate chungchanga Dan leh Hraite zau zawka zirhona hun buatsaih a ni chu lawmawm a tih thu a sawi a. India ramah chuan Mizoram chu hmeichhiate dinhmun that berna pawl State a ni tih sawiin, chutih rualin hmasawnna tur tam tak a la awm tih a sawi a. Hmeichhiate tana Dan leh Hrai chu mi tin hriat atana pawimawh leh nitin nunphunga hman nghal theih a ni tih sawiin, hetih rual hian Hmeichhiate pawhin heng dan atangte hian mahni zawn theuhva mawhphurhna an neihte pawh hriat tel a tul hle tih a sawi a. Hmeichhiate chu eng dinhmunah pawh ding se, khawtlang innghahna lungphum pawimawh berte zing a mi an nih avangin, a bik takin inchhung khura an mawhphurhnate dah pawimawh thiam fo tura chahin, englai pawha danglamna thlen theitu an ni tih inhre reng turin a fuih a. Zirhona hun chu hlawk taka hmang theuh turin kalkhawmte hi duhsakna a hlan nghal bawk a ni.

Zirhona hun hi Dr. Jane R. Ralte, AMWF President chuan kaihruaiin kalkhawmte lawmna thu a sawi a. Pi Lalfamkimi, Advocate-in Mizo Marriage & Inheritance of Property Amendment Act chungchang a zirtir a. Pi Dina Ri T. Azyu, Senior Advocate chuan Hmeichhiate tana Dan leh Hrai hnuaia dikna chanvo leh hamthatna awm angte a sawi zau va. Pu M.S. Dawngliana, 2nd OC, Cyber Crime P/S chuan‘Cyber crime laka Hmeichhiate Himna’ tih thupui hmangin thu a sawi a. Pi K.R. Chhingpuii, AMWF Vice President chuan thusawite hi khaikhawmin, Pu Thomas Lalrammawia, Joint Secretary, MSLSA chuan lawmthu sawiin hun hi a khar a ni.