Hnahthial Post | Oct 6, 2026, Aizawl: Vawiin ni 6/10/2026 (thawhlehni) chawhma dar 11 : 30 ah khan Pu Ramchuana, Secretary to the Government of Mizoram, Finance Department hovin ‘Voluntary surrender of PPO’ chungchanga Sawrkar hmalakna te thlirletna (review meeting) hun neih a ni. Report danin dik tawk lova Pension/Family pension la ten anmahni duhthu ngei a PPO surrender hun, sawrkarin a siam chhung ni 1/7/2026 atang ni 30/9/2026 thleng a PPO surrender dan chu hetiang hi a ni.
Treasury hnuaia Family Pension la mi 563 bakah Bank atanga Family Pension la mi 111; an vaiin mi 674 in PPO an surrender a ni. Heng mi 674 ten an PPO surrender avanga sawrkarin sum a hum tur zat chu thla khatah Rs.1,25,65,901/- ( Nuai za sawmhnih panga singruk sangnga zakua pakhat) a ni a, kum khat ah Rs.15,07,90,812/- (Vaibelchhe sawmpanga nuai sarih singkua zariat sawmpahnih) lai a ni thei dawn a ni.
Hemi chungchangah hian Secretary, Finance Department chuan sawrkar policy tih hlawhtlinna kawngah thahnemngai tak a thawktu, a thawhpui zawng zawng VC/LC/NGO/Kohhran te chungah lawmthu a sawi a ni.
Hetih rual hian voluntary surrender hun a tawp tak avangin dik tawk lova Pension/Family pension la an la awm em tih endik hna thawktu tur Task Force te hmalak dan tur inhrilhfiahna hun neih nghal a ni. Task Force hi Coordinator panga (5) te enkawlna hnuaiah Team 13 ah then an ni a, Team tinah District Treasury Officer theuh te Team Leader an ni nghal ang.
Task Force te hi a hma thei ang ber a fehchhuak thei turin ruahmanna siam a ni a. Thil fello emaw, dik tawk lo emaw an hmu a nih chuan a ti diklo tu chu Show Cause Notice pek an ni ang a, ni 15 chhung insawihfiahna hun pek tur an ni. He endik hna leh a kaihhnawih dangte chu ni 31.12.2026 hma a zawh fel tum a ni.
He review meeting ah hian Chief Controller of Accounts, Accounts & Treasuries leh Finance Department a Officer te leh Team Coordinator te an tel a ni.
Tags
News