Hnahthial Post | 5th February, 2024: Bengvarna tarlan danin Special Judge (Prevention of Corruption Act) Dr HTC Lalrinchhana chuan ni 2.2.2024 a AIR, Aizawla a tak awm si loa mi chhawr anga ziaktu leh dawta artist-te hla record anga ziaktute mi pathumte hremna vawiin (5.2.2024) hian a puang.
Special Court chuan thubuai siam a nih laia AIR Aizawla Asst. Director Zosangzuala chu kum 4 chhung jail tang tur leh cheng nuai 6 chawi turin a hrem a, pawisa hi a pe thei lo a nih chuan kum 3 a tan belh ang.
AIR Aizawla Programme Executive Lalnunziri leh LDC Judy H Lalmuanpuiite chu kum 2 jail tang tur leh cheng nuai 6 chawi tur ve ve in a hrem. Pawisa hi an pe thei lo a nih chuan kum 3 an tan belh a ngai dawn.
Tarlan tawh angin, January 2012 atanga June 2012 inkar chhungah khan chutih hun laia All India Radio, Aizawl Station-a Asst. Director Zosangzuala, Programmme Executive Lalnunziri leh LDC Judy H.Lalmuanpuii te chuan All India Radio, Aizawl Station-a thawk tur angin a tak awm si loin Casual Production Assistants 20 zet chhawr anga in ziak felin, heng ho hi tum 54 zet chhawr angin ziah a ni. He ta tana sorkar pawisa kal ral chu Rs. 2,60,444 nia chhut a ni.
Tin, an ni pathum ruahmanain a tak awm si loin Music Artiste 39 zet te hla record anga tarlan a ni bawk. Heta tana mipui sum kalral hi 6,08,916/- zet ni a chhut a ni.
AIR- Directorate, Akashwani Bhawan, New Delhi in Budget estimate 2011-2012 atan All India Radio, Aizawl hnenah North East Special Package (NESP) hnuaia cheng nuai 8 leh PPSS (Payment for Programme and Special Services of IEBR (Internal and Extra Budgetary Resources) hnuai atanga cheng nuai 86.73 an pek khawih chingpenna a puh an ni.
He thubuai ngaihtuahnaah hian CBI lam thuhretu mi 49 zet court-ah thu zawhfiah an ni a, lehkha leh tul dang court-a pho lan (exhibit) pawh CBI lam hian 1154 zet an nei. Tichuan, CBI lam hian an thubuai hi court-ah finfiah zoin Judy H. Lalmuanpuii hi Programme Secretary a nih angin, Zosangzuala, Head of Programming leh Lalnunziri Programme Executive-te nen in thurual in hetianga a tak awm lo Casual Production Assistant mi 20 leh Music Artiste mi 39 te hi chhawr anga tarlang in, hetiang hlawh tur cheque hmanga buaipuiin, cheque-ah pawh hian Judy H. Lalmuanpuii hian hming sign sak ve thin a, Lalnunziri hian Music Artiste te tan hian Performance Certificate te pawh lo siam sak leh zel a ni. Zosangzuala phalna leh remtihna ang veka buaipui an ni thung.
Cheque lem paruk phei chu Zosangzuala hian SBI, Aizawl Branch ah a hnuaia thawk Lalramtiama, LDC hruaiin dik lo taka pawisa an lakchhuah pawh a mah ngei hian a pawm nghe nghe. Chuvangin section 120B r/w 409/419/420/467/468/471 IPC leh section 13 (2) r/w 13 (1)(c) & (d) of Prevention of Corruption Act, 1988 angin Zosangzuala, Chanmari, Aizawl; Lalnunziri, Tuikhuahtlang, Aizawl leh Judy H. Lalmuanpuii, Khatla South, Aizawl te hi thiam loh chan tir an ni ta a ni.
[News update awlsam taka i dawn theih nan, WhatsApp Channel hi lo join ve ta che: https://whatsapp.com/channel/0029Va5SRQ77dmeSCGESWy0d ]
Share it with your friends!
[Feedback at: chiefeditorhnahthialpost@gmail.com]
[For Advertistment contact: +91 9774 771 645]
HNAHTHIAL POST
Hnahthial Insta Facebook:
Hnahthial Insta (Instagram):
Hnahthial Post YouTube:
Hnahthial Post Twitter:
Tags
News