Hnahthial Post | 4th April, 2024: MZP chuan, MPSC Civil Service combined examination hnalak hnuhnung berah thil fello tam tak a awm ngeiin a hria a, exam paper thenkhatah correcting fluid-te hman niin, mark pek tawhsa thaichhiatna leh mark tihdanglamna hnuhma thahnem tak a awmin a hria a. MPSC hnuaiah hetiang sulhnu mak tak tak a awm hi MZP chuan pawi a ti takzet a. Hetiang thil diklo tak thleng hi MPSC Chairman thiam loh liau liau a nih avangin, MPSC zahawmna humhim a nih zel theih nan leh thalai hna zawng mek ten MPSC-ah rinna an nghah zel theih nan, MPSC Chairman hi bang nghal turin MZP chuan a ngen a ni.
Mizo Zirlai Pawl (MZP) General Headquarters, Aizawl Executive Committee meeting vawi 629-na chu vawiin chun dar 12:00 khan MZP Conference Hall-ah an thukhawm a, Mizoram Public Service Commission (MPSC) hnalak chungchang, Remna Ni chunngchang bakah Federal Council Sitting chungchangte rel a ni. Meeting hi MZP President Pu H. Lalthianghlima President-in a kaihruai.
remna a neih Meeting chuan, Mizoram-in champhaphak 'Remna Ni' June ni 30 chu kumin 2024 hian hman leh nise a ti a. Remna Ni hi Pathianni a nih avangin, ni 28 June, 2024 (Zirtawpni) hian hman nise tih a ni. He hun hi MZP General Headquarters bakah; Headquarters, Sub Headquarters leh Branch te pawhin mahni remchan dan anga hman nise a ti bawk.
Meeting chuan MZP rorelna sang ber dawttu 'Federal Council Sitting' vawi 57-na, ni 11 April, 2024 (Ningani) a School Education Directorate Conference Hall-a neih tura Agenda lutte a thlir lawk a. Heng a hnuaia tarlante hi Federal Council Sitting Agenda atan chhawpchhuah tura pawm a ni:-
- Sairang thlenga rel a lo luh thuai dawn avangin, Sawrkar in Inner Line Permit (ILP) check dan turah ruahmanna felfai zawk a siam theih nan, MZP in hma la rawh se.
- Mizoram Education Department bik enkawl tu tur Mizoram Education Service (MES) kan neih ngei theih nan, MZP in chak zawkin hma la rawh se.
- Mizo Zirlaite ruihhlo laka kan fihlim theih nan MZP in hma la rawh se.
- Ram pum huapin 'Career Awareness' neih a nih theih nan MZP in hma la rawh se.
- Mizoram zirnain hma a sawn theih nan, tuna hman mek kan syllabus hi zirchiana, a tul anga hmalak ni rawh se.
- Zofate sumdawnna leh inchimralna kawng a kan him tlan theih nan, MZP hian zirchianna leh inhrilhhriatna (Awareness Campaign) neih nise, a tul anga hmalak ni rawh se.
- Mizoram 'Schedule Tribe' list ennawn a nih theih nan chak taka hmalak ni rawh se.
Heng bakah hian Pawl chhung thil hrang hrangte an rel a ni.
[News update awlsam taka i dawn theih nan, WhatsApp Channel hi lo join ve ta che: https://whatsapp.com/channel/0029Va5SRQ77dmeSCGESWy0d ]
Share it with your friends!
[Feedback at: chiefeditorhnahthialpost@gmail.com]
[For Advertistment contact: +91 9774 771 645]
HNAHTHIAL POST
Hnahthial Insta Facebook:
Hnahthial Insta (Instagram):
Hnahthial Post YouTube:
Hnahthial Post Twitter:
