Hnahthial Post | 3rd August, 2024: Mizo Zirlai Pawl Headquarters Hnahthial chuan April ni 10, 2024 khan Home Minister Pu K Sapdanga chu a Office MINECO-ah hmuin, Hnahthial a lirthei bo tam lutuk leh ruihhlo phurh luh leh chhuah ven nan Hnahthial luhka hmun 3-ah Closed Circuit Television Camera dah turin an lo ngen tawh a. MZP Hnahthial ngenna hi Home Minister hian ngai pawimawhin Police Hqrs lamah MZP ngenna lehkha hi a thawn a. PHQ lam hian DPR siam turin Aien Consultant, Zarkawt, Aizawl te chu a ti nghal a ni.
Hemi chungchangah hian MZP Hqrs Hnahthial chuan Hnahthial District Addl. SP Pu Beimosia Lapi, MPS chu August ni 1, 2024 khan a Office-ah kawmin CCTV Camera dahna hmun tur te sawi ho a ni a. Hnahthial chhim lamah, Lunglei Road (Highway leh ByPass inpawhna) Hmar lamah, Johann-a Pa Filling Station bul leh khaw chhak lamah Thingsai road, Jehova Jire Home thlangah te dah tura ruahman a ni a. Heng hmun 3 bakah hian, khawchung hmun 5 velah dah theih nise tiin, Addl SP hian MZP hruaitute hi a hrilh bawk a ni.
Aien Consultant te chuan ni 3 August, 2024 vawiin khan Hnahthialah rawn kalin Hnahthial luhka hmun 3-ah te hian CCTV Camera dah dan tur ruahmanna siamin Survey an nei a. Project Report hi kar thar thawlhleh niah chuan peih fel hman an inrin thu an sawi bawk.
MZP Hqrs Hnahthial chuan Home Minister Pu K Sapdanga'n an ngenna ngai pawimawha, Hnahthial luhka hmun 3-a CCTV Camera dah tura ruahmanna a awm chu lawmawm an tih thu leh Home Minister chungah pawh lawmthu an sawi tih, kan thu dawnna chuan a tarlang a ni.
[News update awlsam taka i dawn theih nan, WhatsApp Channel hi lo join ve ta che: https://whatsapp.com/channel/0029Va5SRQ77dmeSCGESWy0d ]
Share it with your friends!
[Feedback at: chiefeditorhnahthialpost@gmail.com]
[For Advertistment contact: +91 9774 771 645]
HNAHTHIAL POST
Hnahthial Insta Facebook:
Hnahthial Insta (Instagram):
Hnahthial Post YouTube:
Hnahthial Post Twitter:
