Chief Minister-in SBI Chief General Manager kawm

Hnahthial Post | 14th January, 2025: Vawiin khan Chief Minister Pu Lalduhoma chuan a office-ah Pu Sahadevan Radhakrishnan, Chief General Manager, SBI, a kawm a. Hand Holding Scheme kaltlanga thawhhona tur thil leh SBI kaltlanga hmalak theihna dangte a sawipui.

Chief Minister chuan, Mizo thalaite Banking sector lama an tlin tlem thin avanga bank-a thawktu indaih lohna te, loan lak dawna bank lamin income tax certificate an lo phut thin chu income tax pe ve lo state kan nih avanga a kalphung tihdanglam tha a tih thu te, Aizawla private bank thenkhat CD ratio hniam lutuk chu veiawm a tih thu a hrilh a. SBI leh bank dangten an CSR tam zawk Mizoramah hmang se an duh thute leh bank nena thawkhova hand holding scheme kalpui tur chungchangah Hand Holding loan bik lo bawhzui nghal zeltu tur thawktu hran an credit processing centre-a dahsak turin a ngen a ni.

Chief General Manager hian, Hand Holding Scheme ruahmanna chu tha a tih thu leh, India ram hmun dangah pawh heng aia tha hi a awm bik chuang lo va a hriat thu Chief Minister hi a hrilh a. A hlawhtlin ngei theih nan SBI chuan a tulna apiangah sawrkar thawhpui dawn tih a sawi. Chief Minister hian Hand Holding bik loan lo umzuitu tur bik thawktu, an credit processing centre-a dah pawh an lo tum tur thu a sawi a ni.

Naktukah State Level Banker Meeting, Chief Minister hovin an neih zui leh ang.

Chief Minister hi Pu TBC Lalvenchhunga, Adviser to CM, Dr. KC Lalmalsawmzauva, Adviser to CM leh official pawimawh ten an tawiawm a ni.