Pu Jeje Lalpekhlua, MLA in Khawhri Haw Runpui hun a hmanpui

Pu Jeje Lalpekhlua, MLA in Khawhri Haw Runpui hun a hmanpui

Hnahthial Post | 7th January, 2025: Vawiin khan Hnahthial District Khawhri khua chuan Haw Runpui hun an buatsaih a, he hun hi South Tuipui Bialtu MLA Pu Jeje Lalpekhlua chuan khuallian niin a hmanpui a, Dr. Lalrinawmi Ralte, Zakapa Award hmasa ber dawngtu leh awm chhun chuan Zakapa Lim a hawng a, naktuk lamah pawh haw runpui hun hi buatsaih chhunzawm a ni dawn bawk a ni.

He huna khuallian Pu Jeje Lalpekhlua MLA chuan Lal huaisen Zakapa lalna tlang Khawhri khaw haw runpui a hmanpui thei leh Zakapa lim hawn a ni thei ta chu lawmawm a tih thu te, khawtlang hruaitute, MLA kal chhuak ta leh khawtlang mipuite inlungrualna a fakawm a tih thu te, khawtlang mipuite pawh an thil tihna kawng hrang hrangah Lal Zakapa ang bawk huaisen na nen hma la a, hmeichhia te huaisen taka a humhim thin angin khawtlang chu dikna leh rinawmna huaisen taka tan tlat turin ka fuih a. Hnahthial bial chhung khaw hrang hrang ah pi leh pute sulhnu hmuh tur tam tak a awm chu vanneihthlak a tih thu te, hei hian kan bial ropui zia a pholanga a hriat thu leh pi leh pute sulhnu hrang hrang te ngaihlu a, humhal zel tur a nih thu pawh a sawi a ni.

MLA Pu Jeje Lalpekhlua chuan, hlawhtlinna kawng hi a awlsam lova, thi leh thau pawlha theih tawp chhuaha beih a ngai thin a, kan chawr chhuahna aiin engnge kan thlen chin tih hi a pawimawh zawk a, thlen chin tur lam pana theih tawp kan chhuah thin a tul. ZPM party in sorkarna a chan phat atangin beihna nasa tak tawk thin mah se, Pathian hruaina zarah hmasawnna tam tak hmuh tur a awm tiin Chief Minister, Minister ten ram an kaihhruaina kawngah theih tawp an chhuah thu sawiin kuthnathawktute lamah an tan tlat a, a hlawhtlinna pawh kan hmu chho mek a ni tiin ram hruaituten ram an kaihhruaina kawngah finna, remhriatna an neih thar zel theih nan tawngtaipui thin turin a chah bawk a ni.

He hunah hian Dr. Lalrinawmi, Zakapa Award dawngtu in thu a sawi a, Pu HC. Thanchungnunga'n Zakapa Chanchin paper a present a, Khawhri khaw chhuak mi hmingthate chawimawina hun te hmangin, zaithiam ten zaiin kal khawmte a awi a, tlaiah khawtlang huapin ruai an theh bawk a ni.