St Stephen School Hnahthial chuan Parents' Day hun hmang.

Hnahthial Post | 24th January, 2025: Vawiin chawhnu dar 1 khan Electric Veng, GSA Hall Hnahthialah St Stephen School, Hnahthial chuan Parents' Day & Annual Day 2025 hun hmangin Pi LT Rose Mary Hnamte, CDPO Hnahthial chuan khuallian niin a hmanpui a, Rev Lalawmpuia, (Pastor, Presbyterian Churh Hnahthial) chuan hunserh a hmang bawk.

Khuallian, Pi LT Rose Mary Hnamte, CDPO Hnahthial chuan St Stephen School Hnahthial-in Parents' Day & Annual Day 2025 hun an hmang thei chu lawmawm tiin, khuallian atana an sawm chu a lawm thu a sawi bawk a. Zirlai nu leh pa kal khawm te chu, an fate enkawlna kawngah an phak tawka ṭha bera enkawl turin leh fîmkhur taka enkawl turin a chah a; zirlaite pawh, an chhungte'n an enkawlnaah lawm tur leh inchhung khura an phak tawka chhungkuaa ṭangkai turin a chah a ni.

St Stephen School, Father Jottin Jose, Principal chuan St Stephen School chanchin tlangpui leh hmalaknate tarlangin, Zirlaite pualin intihhlimna hun hrang hrang an hman ṭhin thute a tarlang a ni.

Khual zahawm Pu Jimmy Lalrosanga, President MZP Hqrs Hnahthial chuan thusawiin, Zirlai nu leh pate chu, an fate'n zirna kawngah harsatna an tawh chuan MZP Hqrs Hnahthial chu an tlan chhiat loh thu leh Zirna kawngah Hnahthial-in hma a sawn theih nan nu leh pate'n lehkha zir kawngah an fate fuih thar leh turin a chah a. Zirlai, zirna kawngah emaw Zirna Ina harsatna tawk te tan MZP Hqrs Hnahthial chu a awm reng a ni a ti bawk.

Khual zahawm, Pu C.Lalbuatsaiha, VCP Hnahthial North - I pawhin thusawiin, hmasawnna bul ber chu Zirna a nih avangin Zirtirtu, Zirlai bakah nu leh pate'n ngaipawimawh thar leh turin a chah a. Nu leh pate chu an fa, zirlaite Social Media khawih tam lutuk lo turin leh Phone khawih tel tir a, lehkha chhiar tam turin thei chhuahpuiah a sawm a. Phone tello a thil tih leh chet vel har viau mahse, chin tawk thiam turin kal khawmte chu a chah bawk a ni.

Khual zahawm dang, Pi Zorinmawii, Protection Officer, DCPO Hnahthial pawhin thu sawiin naupang dikna chanvo leh enkawl ngaite, naupang dan lo a che te chungchang JJB-in an ngaihtuah dan te sawiin Hnahthial-ah naupang enkawl leh dan lo a che eng emawzat awm tawhin, naupang harsatna tawkte chu DCPO-ah emaw Child Help line 1098 -ah te Report zel turin kalkhawmte a chah a ni.

Nikum lama Zirlai Pass ṭhate lawmpuina leh Pawl sawm Zirlai, kal chhuak turte thlahna hun hman nghal niin, Class hrang hrang atangin Zirlaite chuan ennawm hmuh nawm tak tak entirna hun an hmang bawk a, Father Johnson, Vice- Principal, St Stephen School chuan kal khawmte chungah lâwmthu sawina hun a hmang bawk a ni.