Hnahthial Post | 13th May, 2025: Denlung khawtlangin vawiin ni 13th May, 2025 chawhma lama Hnahthial By-pass kawng siam mektu, Mathiyan Construction Pvt.Ltd te hnathawk tur an Base Camp-a kal chilha an dan chu ti tawpin, Mithiyan Construction Pvt.Ltd te hian ni 16th May, 2025-ah Denlung khaw kawng an tih chhiat chu siam an intiam thu an sawi.
Denlung khawtlang hruaitute hnen atanga Hnahthial Post thu dawn danin, Hnahthial By-Pass kawng siam mektu Mathiyan Construction Pvt. Ltd te chuan an khaw kawng, chi seh an lamna ber chu lei vunga chhungin, an khaw panna tur kawng awm meka chu a chho ulh lutuk avangin Company hnenah hian siam tha turin vawi tam an sawi a, Company lam hian an siam tur thu hi sawi thin mahse, siam tak tak a awm loh avangin nizan ni 12th May, 2025 khan General Body Meeting, YMA Branch Denlung leh VC huaihawtin neih a ni a; meeting chuan Company Base Camp-ah kalin, May ni 14th, 2025-a an khaw kawng siam an intiam theih dawn loh chuan, an hnathawk tur dan reng tumin, an rel a. An thu rel bawhzui nan, vawiin chawhma khan Company Base Camp-ah kalin an hnathawk tur hi an dang ta a ni.
Hemi chungchangah hian vawiin vek khan Hnahthial DC Meeting Hall-ah, Hnahthial Addl.DC, Mathiyan Construction Pvt.Ltd leh Denlung khawtlang aiawhte an thukhawm a. Mathiyan Construction Pvt.Ltd hotute chuan, May ni 16th, 2025 Zirtawpniah Denlung khaw kawng hi an siam tur thu leh ziaka an dah tur thu sawiin, Denlung khawtlang hruaitute erawh chuan, Khawtlang mipuite duhdan hriat hmasak loh chuan engmah an sawi chiah theih loh thu an sawi a.
Meeting zawh hian Company Base Camp-ah Company lam hotute leh mipuite'n sawi hona neiin, Denlung khawtlang mipuite chuan General Body Meeting-a an rel anga kaltlang pui tura tih a ni a. Mathiyan Construction Pvt.Ltd te chuan ni 16 May, 2025 ral hmaa hmun danga an thawh sawn theih loh thu an sawi thung a. Kawng siam an duh dan hi a hmunah Hnahthial Addl.DC Pu Zothanmawia Khiangte hova en nawn lehin, ni 16 May, 2025-a Company lamin an intiamna chu pawm a ni.
