Hnahthial Post | 13th May, 2025: Denlung khawtlang chuan YMA Branch Denlung huaihawtin Mathiyan Construction Pvt.Ltd Base Camp, Hnahthial Peniel Veng hnuai a mi chu vawiin ni 13th May, 2025 chawhma khan luhchhuahin, Hnahthial By-pass kawng siam mektu, Mathiyan Construction Pvt.Ltd te hnathawk tur an dang.
Denlung khawtlang hruaitute hnen aṭanga thu kan dawn danin, Hnahthial By-pass kawng siam mek hian an khua Denlung kawng chu tan tlangin, kawng laihna lei vung eng emaw zat chu an khaw kawng lamah hian nawr liam a ni a. Hei hian, an khaw kal kawngah harsatna thlen ṭhinin, Company lam hotute bulah siam turin vawi tam an hrilh tawh a, Company lam hotute hian, 'Kan siam ang' tiin ṭawngkam ṭhain an lo thlah mai ṭhin.
Denlung khua chuan an khaw kawng, chi seh an lakna ber hi tun fur-pui thlen hmaa siam ṭhat a nih theih nan, Company lam hotute chu dawr lehin an ni lam aṭang hian chhanna mumal an hmu lo a, nizan ni 12th May, 2025 khan General Body-Meeting neiin an khaw kawng, Company lam lei vung an nawr liamna hi ziaka an siam tur thu dah a nih hma chu, Mathiyan Construction Pvt. ltd te hi hnathawk lo turin an dang a ni.
Chanchin kan buatsaih lai hian Hnahthial District Addl.DC hovin Company lam hotute leh Denlung khawtlang hruaitute chu an indawr mek a, chanchin kimchang ngaihchan mek a ni.
Tags
News