Hnahthial Post | 15th May, 2025: YMA Branch Chanmari, Hnahthial hnuaia Committee peng pakhat Education Committee chuan zanin ni 15th May, 2025 dar 7:30 khan an veng chhunga HSLC leh HSSLC Result chhuaka pass thar, an vaiin mi 30 te chawimawina hun an hmang.
Pu Lalduhthlana, Chairman, Education Committee, chuan hun kaihruaiin, Pu Laldinpuia, Secretary, Education Committee chuan inlawmna leh report tawi pein, kumin 2025-a MBSE-in HSLC leh HSSLC Result a tih chhuahah HSLC aṭangin mi 13 leh HSSLC aṭangin mi 17, an vaiin mi 30 pass chhuak an nei a ni.
Pu K Lalchhuanmawia, VCP, Hnahthial South - III chuan thusawiin, Pass chhuakte hnenah Pass chhuah ngawr ngawr hi hlawhtlinna a ni lo, tiin Pass tharte chu lehkha zir chawlhsan lo turin leh an bul ṭannaah ngaiin theih tawp chhuah zel turin a chah a, an zirzawmna turah ṭhiante Subject lak ang ringawt la mai lo va, zirchiang turin leh a thiam zawk leh hre zawkte rawn hreh lo turin a chah a ni.
Pu Lalnunpuia, Adviser, YMA Chanmari Branch pawhin thusawiin, 3idiots film hmuhnawm takin, Zirtirna ṭha tak a neih, chawrh tlaka zir, ang khan Zirlai te chu chhawr tlak ni tura zir turin a fuih a. Pawl 12 pass chhuak tharte chu, uniform ha tawh loin, College-a zir tawh tur in ni a, fimkhur ula, nun uluk a ngai a ni, tiin zirlaite a fuih a. Hlawhchham nia an inhriat chuan, chu chu hlawhtlinna kailawn atanah inzir nana hmang turin leh tum nei rana zir turin a chah a, tuna zirlai chawimawi te chawimawi chhunzawm tlak ni zel turin a chah bawk a ni.
Thusawitu dang Pu Kv Vanlalneiha, Treasurer, YMA Sub-Hqrs, Hnahthial chuan YMA Branch Chanmari-in zirlaite ngai pawimawh a, hetiang hun an buatsaih thei hi a lawmawm a tih thu sawiin, zirlaite fuihna thu a sawi chhunzawm a; zirlaite pass chhuakte chu Sorkar hna an thawk vek dawn lo tih pawm turin leh ei zawnna nghet, chhungkaw chawmna tlak eng pawh thawk hreh lo turin a chah a. Chhungkaw chawmna tlak eng hna pawh thawk turin a fuih a ni.
Benjamina Ramdinthara, Fin.Secy, MSU District Hqrs Hnahthial chuan thusawiin, Zirlai harsatna tawk te'n MSU District Hqrs Hnahthialah thlen hreh lo turin leh zirlaite chu an kal zelna turah duhsakna an hlan bawk a ni.
Tv C Rodingliana, Vice-President, MZP Hqrs Hnahthial chuan thusawiin Kum 1920 khan Mizote'n Assam Civil Service (ACS) a in ziak tling kan nei tawh,a hmasa ber dawttu kha Pu R Buchhawna, MZP (Lushai Students Association) dintu kha a ni.
Pu R Buchhawna kha Mizo zinga lehkhathiam hmasa,lehkhabu lo kawm tlangnel hmasa ni. Khatih hunlai khan Mizoram hi state a la ni lova Assam hnuaia awm kan ni a,Matric exam kha har an ti em em a, pass chhuah pawh a har a, Mizote tan kulh pui sang tak, lawm chhuah rual loh a ni. Hnam dang Khasi tih te ho kha chuan an ṭawng subject ah an nei tawh a, an pass ve mai zel. Mizoten kan tawng, Mizo subj kan la nei tlat lo kha a vei em em a, tichuan Assam state Education Minister hnenah a thlen ta a, a thawhrimna a zarah Mizote'n Mizo subj kan lo zir theih phah ta a ni.
Mizo subj telh tura ngen kha Pu R Buchhawna tih tur leh hna a ni biklo,mahse Mizo hnam tan a dinhmun aṭangin,a phak ang tâwkin a bei mai zawk a ni. Kan mi hmasa te khan an thiamna leh an theihna hmang khan kan hnam tlemte kha sang taka hruai tumin an lo bei ṭhin a ni.
Chuvangin zanina HSLC & HSSLC a hlawhtlinna chang thar te pawh taima takin, Ram hnuk khawih pha in zir zel ula. In thiamna leh theihna te Nangmahni leh in chhungkua chauh nilo, Ram leh khawtlang hian chhawr ngei rawh se.
Chumi atan chuan lehkhabu chhiar tam kan mamawh a ni. Kan khawvel thlir ila,kan kohhran, kan khawtlang thlir ila, mi in chhiar tam apiang an fing tawh mai a, mi educated te rorêlna khawvel a ni tawh a ni. Chuvangin, sang tak thleng zir tum zel rawh u.
Eng hna pawh eng kawng pawh zawh ula, lehkhabu hi lo thlahthlam ngai suh u, finna a chhungah hian a awm a, Lehkhabu kaltlang zir thiamna hi a tlo a,a nghet bawk a ni.
A tawp berna atan chuan, Ram leh hnam hmangaihna thinlung pu in lehkha hi zir ula, Beidawnna in hneh tir ngai suh u. I ram tan i theihna sang ber hlan tum tlat la, Mizo hnam hi sâng tak thlen pui tum tlat rawh.
Pu David Laltanpuia Hmar, Vice Chairman, Education Committee chuan kal khawmte hnenah leh sawm bikte hnenah lawmthu sawiin Zirlai pass tharte chawimawina hun khar a ni.
Tags
News