Hnahthial Post | 19th May, 2025: Mizo Zirlai Pawl Headquarters Hnahthial chuan ni 17th May, 2025 Inrinni zing dar 6:30 khan Bazar Branch YMA Hall-ah an thu dawn bawhzui nan leh an Pawl thil tum 'Inchimal theihna laka Mizo Hnam humhlah' tih hlawhtlin nan hnam dang Vai, Inner Line Permit Checking neiin, he hunah hian Hnahthial khawchhunga awm vai mi 75 an inlan a, an zinga mi 8 te chuan Inner Line Permit an nei lo.
MZP Hqrs Hnahthial chuan hnam dang Vai, ILP nei lo an awm tih thu dawngin, Executive Committee Meeting-in hemi chungchang hi an ngaihtuah a, Town Branch YMA tinah information Mic-ah puangin hemi ṭuma rawn kal lo hi a thawh hnihah na zawka khawm leh tum a ni.
ILP Checking chungchanga Hnahthial Post zawhna chhangin, Pu PC Lalhlimpuia, Secretary, MZP Hqrs Hnahthial chuan Hnahthial khaw chhungah hian mi thenkhat, hnam dang vai mi pakhatin 5 leh a aia tam Sponsor an awm tih sawiin, ILP chungchangah hian tun aia na zawk leh khirh zawk a an enfiah tawh tur thu a sawi a, ILP Sponsor-tuin an mawhphurh ve na te hre reng turin leh hnam dang vai tan bur Mizo te zingah awm lo turin ILP Sponsor-tute a ngen a ni. Hmasawnna kawng siamtu Company vai te pawh, hun dangah enfiah an tum thu an sawi bawk.
Inner Line Permit nei lote hi ni 17th May, 2025 Inrinni zing vek khan MZP Hqrs Hnahthial, President Pu Jimmy Lalrosanga hmingin FIR thehluh a ni a, Hnahthial Police Station, Lock-Up ah dah luh nghal an ni.
Tags
News