Hnahthial Post | 22nd May, 2025: Vawiin khan Pi Vanlaldiki Sailo, Mizoram State Commissioner for Persons with Disabilities (PwD) chuan Sugamya Yatra hnuaiah Accessible India Campaign neiin Hnahthial a tlawh a, he hunah hian sorkar hmun pawimawh Deputy Commissioner Office, District Hospital, Government Hnahthial College leh Govt Higher Secondary School te chu rualbanlote tana thlen phak leh awlsam zawka dawr theih an nih leh nih lohte a hmunah kalin a enfiah.
Pi Vanlaldiki Sailo chuan 'Accessibility India Campaign' hnuaiah rualbanlote thlen/pan theih lohna a awm em tih zirchiang tura Hnahthial tlawh a nih thu a sawi a. All India Campaign a nih angin state hrang hrangah hmalak mek a ni tiin, Mizoramah pawh chak taka hmalak a nih thu a tarlang. Zirna In leh sawrkar building zawng zawng chu rualbanlote tana thlen phak a ni tur a ni a, toilet/ bathroom-ah pawh rualbanlote hman tur bik siam a tul hle a ti. State Commissioner for PwD chuan India Sawrkarin Rualbanlote a ngai pawimawh hle a, chuvang chuan Sawrkar hun pawimawh leh thiltih kalphung engkim an hriat ve theihna turin sawrkar chuan Interpreter (Sign language thiamte) a hmang uar tawh hle a ni a ti a. Hnahthial District atanga sign language course zir tur lo zawng turin a chah a, vanduaina avangin zan khat thila rualbanlo thei vek kan nihna hriaa theihtawpa rualbanlote tana thawk zel turin a chah nghal bawk.
Pi Vanlaldiki Sailo hian Office, College leh School a tlawhnaah hian Rualbanlote tana hamthatna an siam hrang hrangte a endik a. A bik takin toilet, grab bars leh Ramps bakah signage tar a awm leh awm loh te a enfiah a. Rualbanloten awlsam zawka Office an dawr theihna tur te, an inentir theihna tur leh nuam zawka zirna in an kai theihna tura theihtawp chhuah tura chahin, an dikna chanvo lo humhalh sak zel turin a sawm nghal a ni.
Pi Vanlaldiki Sailo, Mizoram State Commissioner for Persons with Disabilities (PwD) hi Pu R. Vanlalruata, SDC bakah ICDS office aiawh, Samagra Shiksha Abhiyan, Hnahthial District aiawhte, Media thenkhat ten an tawiawm a ni.
Tags
News