Hnahthial Post | 10th June, 2025: Vawiin khan Government High School Hnahthial-ah District Project Office Samagra Shiksha Hnahthial District bul tumin Hnahthial District-a Nute puala thing phun (Ek Ped Maa Ke Naam 2.0) kalpui tur hawnna hun hman a ni a. He hunah hian Pi K. Vanlalruati, District Bawrhsap chuan khuallian niin Hnahthial District-a Ek Ped Maa Ke Naam 2.0 kalpui tur chu a hawng a, High School tualah thing tiak a phun nghal a ni.
Khuallian Pi K. Vanlalruati, District Bawrhsap chuan thing phun pawimawhna leh tangkaina sawiin in leh lo din kan duh avang te, hmasawnna hnathawh avang tein kan ram ngaw neih te kan tichhe mek zel a ni a ti a. Hei hian sik leh sa inthlak danglam te thlenin khawvel hi a tih lun tulh tulh thu a sawi a. Khawvel hmun sawma thena hmun khat pawh hi ram ngaw kan nei tawh lo niin mithiam te chuan an sawi a, hei vang hian ram ngaw, thing leh mau humhalh hi kan tihtur pawimawh ber a ni a ti bawk. Thing leh mau kan phun belh a pawimawh thu sawiin chutih rual chuan thing leh mau phun ringawt hi duh tawk mai lovin, a puitlin ngei theihna atana enkawl pawh hi kan tihtur a ni tiin thing phun uar sauh sauh turin kal khawmte a chah bawk a ni.
Inkhawm hi Pu H. Sangthanga, District Education Officer, Hnahthial in a kaihruai a. Ek Pad Maa Ke Naam 2.0 hian June ni 5 atanga September thla thleng a huap dawn a, hemi hun chhung hian Hnahthial District-a School tinin a tlem berah thing kung 70 tal hmun awl remchangah phun tur a ni a ti. Pu Lalsangzuala, Range Officer, Environment Forest and Climate Change Department, Hnahthial Range chuan Importance of Environment Conservation chungchang a zirtir a. Pu C. Lalzarliana, Dy District Project Coordinator, Samagra Shiksha Hnahthial in lawmthu sawiin hun a khar a ni.
Tags
News