Hnahthial Post | 10th June, 2025: South Tuipui Bialtu MLA, Pu Jeje Lalpekhlua chuan Tarpho Community Hall, Field Vengah YMA Tarpho Branch Golden Jubilee lawmna programme chu khuallian niin a hawng a, YMA chu dikna leh tlawmngaihna vawng nung zel turin a chah a ni. He hunah hian Pu Lalhmangaihhlua, Addl SP chuan 'New Criminal Law' chungchang inhrilhhriatna hun hmangin Fisheries Department atangin lundung nungchate humhalh pawimawhna ngaihthlak a ni bawk.
MLA, Pu Jeje Lalpekhlua chuan Tarpho YMA Branch kum 50 tlin lawmna a hmanpui thei chu lawmawm a tih thu sawiin YMA chu an dinchhan chawinung zel turin a chah a. Theli bik nei lova dik taka hma la zel tura chahin chanhai riangvai tanpuitu ni zel turin a chah a ni. Midang pui tur chuan hriatna lamah pawh hma kan sawn theuh a tul thu sawiin YMA, a bikin thalai zawkte chu tunlai sawrkar hnuaia hamthatna hrang hrang awmte chu zirchianga an thenawm upa leh hawi harh thei tawh lo zawkte pui thei turin lo inzir turin a chah a. Sawrkar hnuaiah scheme leh mahni inkhaidinna tur loan tha tak tak a awm thu sawiin tun sawkar flagship programme, Handholding policy pawh a chhawr tangkai tute zing ami ni ngei turin a chah a ni.
Tun dinhmunah Handholding policy hnuaiah Hnahthial atangin sawhthing Quintal 12,250 hralh chhuah a nih tawh thu sawiin a vaiin Hnahthial District-ah lo neitute tan cheng nuai 612 lai mai a lut ta chu thil lawmawm tak a nih thu a sawi a. Handholding scheme mai bakah a thlawna in enkawl theihna, Mizoram Universal Healthcare Shceme lo zirchiang a, lo inziaklut ve theuh turin mipui pungkhawmte chu a chah bawk a ni.
Ruihhlo laka inthiar fihlim tura chahin YMA leh NGO hrang hrangte chu ruihhlo dona kawngah sawrkar chu theihtawpa pui turin a ngen a. A hma hruaitu, a hnung dawltu ni theuh tur leh tlawmngaihna vawng nung zel turin mitinte chu a chah a ni.
Pu Jeje Lalpekhlua chuan Community Hall chei thar nan cheng nuai 2 hlanin YMA hnenah jersey a hlan nghal a, Jubilee Dar vuain YMA Tarpho kum 50 tlin lawmna chu a hawng a ni.
He hun hi Pu F. Rosangliana, YMA Br President chuan a kaihhruai a ni.
Tags
News