Hnahthial Post | 10th June, 2025: Nizan (9th June) khan Hnahthial District YMA Branch 24 telna, MLA Cup Inter Branch YMA Football Tournament, 2025 chu bialtu MLA, Pu Jeje Lalpekhlua chuan khuallian niin a hawng a. He Kick-off programme-ah hian Bawrhsap, Pi K. Vanlalruati chu khual zahawm niin YMA leh HDFA hruaitute bakah officials dangte he kick-off programme-ah hian an tel a ni.
Khuallian chuan infiammi thalai kalkhawmte hmaah thu sawiin VC te kaltlangin infiamna lama mahni khua mamawh tur coach hrang hrang, sawrkar sports council hnenah dilna thlen theih a nih thu a tarlang a. Hnahthial District chu a hamthatna dawngtu ni a, coach tam thei ang ber chahluttu ni tura a duh thu a sawiin infiamna lamah hmasawn zel tura tih ngaite chu a sawi a. Hlawhtlinna chang tur chuan thiante ai baka thawh rim te, mi hmuhsitna leh diriamna kara mahni tum ram pan hram hram te leh chapo lova coach leh midang thurawn ngaihthlakte hi a pawimawh thu a sawi a. Ruihtheihthil tichhin ngai lo tura chahin infiamna leh zuk leh hmuam hi a kalkawp thei lo a ni a ti bawk.
Khuallian chuan zirna thlahthlam chuanglo turin infiammite chu chahin lehkha thiamlo ai chuan lehkhathiam chu infiamnaah pawh tangkaina an ngah zawk thu a sawi a. Tawng pawimawhna sawiin infiamna zinkawng zawh zel tur tan chuan Hindi tawng thiam tel ngei turin a chah bawk a ni.
Khuallian chuan zirna thlahthlam chuanglo turin infiammite chu chahin lehkha thiamlo ai chuan lehkhathiam chu infiamnaah pawh tangkaina an ngah zawk thu a sawi a. Tawng pawimawhna sawiin infiamna zinkawng zawh zel tur tan chuan Hindi tawng thiam tel ngei turin a chah bawk a ni.
Khual zahawm chuan football hi Mizo nuna bet nghet tlat tawh pakhat a nih thu sawiin chhungtin deuh thaw a luhkhung tawh thu a sawi a. Chumi kawng zawh a, hlawhtlinna chan ve tumte tan chuan teirei peina leh insumtheihna chu a pawimawh thu hre reng turin infiammi thalai kalkhawmte chu a chah a ni.
He hun hi Pu K. Lalremruata, Fin. Secy., Sub Hqrs YMA chuan kaihhruaiin YMA Branch hrang hrang tan thutiam lakna (oath taking) leh jersey pho lanna(jersey parade) neih a ni bawk.
Tags
News