ICT Minister Dr Vanlalthlana in Chanchinbumite a kawmnaah E-Office hmalakna leh Sawrkar Department Website tihchangtlun chungchang sawifiah

Hnahthial Post | June 25, 2025, Aizawl: Vawiin chawhma khan ICT Minister Dr Vanlalthlana chuan a Pisa-ah Chanchinbumite a kawm a. He hunah hian lehkha hmanga file system kalpui mek thlakna tur E-Office kalpui tan a nih chungchang te leh Sawrkar Department Website kan hman mek te tha zawka siam hna thawh mek a nih chungchang te a sawi fiah a ni.

Pu Amit Sharma, Secretary, Information & Communication Technology (ICT), Pu James Lalnunmawia, CIO, ICT leh ICT Officer ten Minister hi an tawiawm a. Chanchinbumite hnen atanga zawhna te an chhang bawk a ni.

Chanchinbumite hmaa Dr Vanlalthlana, ICT Minister thusawi leh sawifiahna chu a hnuaiah hian tarlan a ni e.

I e-OFFICE

Mizoram Sawrkar chuan chak zawk leh lang tlang zawka sawrkar file-te a kal theihna turin eOffice hman ṭha a ti a, January 2024 aṭang khan hma lak ṭan a ni. A bul ṭanna (pilot) atan Secreteriat tih hmasak a, chumi zawha Directorate leh District Office-ah te kalpui tura ruahman ni. Hemi atan hian fund awm thei ang angte ngaihtuah nghal a ni a. Proposal siam niin Department of Administrative Reforms & Public Grievance (DARPG), Govt. of India hnuaia State Collaborative Initiative Scheme (SCI) aṭangin vaibelchhe ₹1.99 chu October ni 11, 2024 khan hmuh a ni a. He tih mek lai hian Ministry of Electronic & IT, Govt. of India chuan kum 3 chhung atan North-East States leh UT (J&K and Ladakh)-te tan eOffice license leh hosting man min tumsak tur thu kan dawng ve leh bawk a ni.
Mizorama eOffice implementation atan hian Department of Personnel and Administrative Reforms (DP&AR) chu nodal department niin, implementing department hi Department of Information & Communication Technology a ni a. Tuna eOffice atana kan software hman hi NIC siam a ni a, deployment leh hosting hi RailTel lam tih a ni thung.
DARPG, GoIa aṭanga vaibelchhe ₹1.99 kan dawn hi computer set, printer, leh scanner lei nan bakah, training leh eOffice kalpuina senso hrang hrang atan hman chhoh mek a ni a, Secretariat building-a IT infrastructure pawh thuam ṭhat chhoh mek a ni. Hei bakah hian internet ṭha tak neih a pawimawh dawn avangin 1 Gbps backup line bakah, BSNL aṭangin redundant line tur 1 Gbps dark fiber nei turin hma lak mek a ni bawk.
December ni 10, 2024 khan stakeholders kickoff meeting neih niin eOffice kalpuina tur atana document ṭul hrang hrangte chu NIC leh Railtel-ah te pek nghal a ni a; eOffice implementation chu Secretariat bik atan chuan bul ṭan chhoh a lo ni ta a ni.
He project atan hian training leh handholding ti turin NIC Mizoram chuan mi 7 hmangin min ṭanpui bawk a. Anni nen hian training pawh vawi eng emaw zah neih a ni tawh bawk.
eOffice hi April ni 18, 2025-ah ‘Go-Live’ niin hman ṭan a lo ni ta a. A tirah Secretariat-a Department thlan bik pali, DPAR(GGT), ICT, School Education leh PWD-ten an hmang hmasa a. Tunah chuan, Secretariat-a Department zawng zawng (41) bakah Chief Minister Office (CMO)-ah te hman a ni tawh a ni.
eOffice hmang hian file 6,492 kaltir a niin heng file-te hi vawi 63,565 khawih chet tawh a ni. File kal hi a chakin a awm reina dawhkan hmuh theih vek a nih avangin tu mahin file an kawl rei ngai lo a tih theih. File pawimawhte pawh in lamah leh zinna thlengin a en khawih theih vek a. Hei hi a bikin Minister, Chief Secretary, Secretary leh senior officer-ten an hmang ṭangkai ṭhin hle. File bo a awm theih tawh lo bakah, file ken kual a awm tawh loh avangin confidentiality atan pawh a ṭangkai em em a ni. Tin, lehkhapuan hman a tlem tawh dawn avangin sawrkarin sum tam tak a hum thei dawn bawk a ni.

II Website Server Upgrade

ICT Department hian mizoram.gov.in domain website 318 leh web application 14 a enkawl mek a. Institution domain ac.in leh edu.in hnuaiah website 12 a enkawl bawk. Heng zinga website tam berte hi ICT department siam (in-house), Senhri Content Management System a ni a. Heng website-te hi kum 10 chuang Ctrl-S Data Centre-ah host a lo ni tawh a ni.
Tun hnaiah India leh Pakistan inkar boruak a ṭhat loh bakah India ram hi khawvela ram hamsawn pawl a lo nih tak avangin ram hrang hrang aṭangin cyber attack ṭhahnem tak a awm reng a. Kan state bik chauh ni lovin, state hrang hrangte pawhin hei hi an tawng ve reng bawk a. Khawvel boruak inlumlet zel thlirin ICT infrastructure thuam chak hi tih makmawh niin kan ngai a. Chuvangin, kan server host-na ṭhin Ctrl-S Data Center aṭangin a aia ṭha zawk leh secure zawka ngaih Google Virtual Private Server (VPS) lamah insuan ṭha zawka hriat a ni a, hma lak chhun zawm a ni ta a ni.
ICT Department chuan June ni 12, 2025 khan sawrkar website hrang hrangte server upgrade a nih dawn avangin, a hmang ṭhintu mipuite tan hun eng emaw ti chhung chu tlawh pawh theih a nih loh tur thu Office Circular a tichhuak a ni.
Google Virtual Private Server (VPS) thara website hrang hrangte suan luh a nih dawn takah chuan website zawng zawng hi internal security audit tih leh vek a ni a. Website 318 chuang audit hian hun pawh a duh rei deuh dawn a ni.
Vawiin thleng hian department website 23 tih nun tawh a ni a. Chungte chu – ATI, School Education, Samagra, Higher & Technical Education, I&PR, Health & Faliy Welfare, GAD, RD&A, LR&S, DP&AR, Finance, Home, LAD, PHE, Planning, Power & Electricity, Transport Department, ICT, Institutional Finance & State Lottery, LADC, MPSC,Tender website leh CMO te a ni a. Tin, web application kan neihho, ILP, Handholding, Dakpu, DC Online, e-Leave, mPass, Fire & Emergency Online, Land Tax, MAeNGA, Mizothlaithar, MPSCOnline, RTI Online, SPARTAN leh Service Window-te pawh mipuite tan hman theih turin Google Virtual Private Server-ah dah fel vek thaw a ni bawk.
ICT Department chuan hun eng emaw chen website service tihkhaihlak a nih avangin mipuite hriatthiamna kan ngen a. Amaherawhchu, he server infrastructure upgrade hi kan hma huna sawrkar leh mipuite tan him leh ṭha zawka website hman theihna tur a nih avangin, mipui leh sawrkar office hrang hrangte hriat thiamna leh thawhpuina kan ngen a ni.