Adviser to CM (Finance & Planning)-in CSR chungchang inhrilhhriatna hun a hawng

Hnahthial Post | June 25, 2025, Aizawl: Pu TBC Lalvenchhunga, MLA, Adviser to CM (Finance & Planning), Mizoram CSR Cell Chairman ni bawk chuan vawiin khan I&PR Auditorium-ah CSR Cell, Govt. of Mizoram leh Confederation of Indian Industry (CII) tangkawp buatsaih, ni thum chhung awh tur, NGO leh Corporate Social Responsibility (CSR) Implementation Agency-te hnena CSR chungchang inhrilhhriatna hun (Capacity Building Workshop) chu khuallian niin a hawng.

MLA Pu TBC Lalvenchhunga chuan he CSR chungchang zirhona hunah hian thu sawiin, kalkhawmte hnenah CSR lama hmasawnna tura sawrkar hmalaknate a tarlang hmasa a. CM Office hnuaia CSR Cell chu mipuite hamthatna atana thawktu, NGO leh CSO-te puibawmtu tur atana din a nih thu leh CSR hmanga sum dawng tur leh hmang tangkai tura mamawh chi hrang hrangte hriatchian theihna atana mithiamte thiamna chhawr tangkaia he inhrilhhriatna hun a thlawna buatsaih a ni hi lawmawm a tih thu a sawi.

Mizoram-ah ngei CSR Conclave neih a nih thuai theih a beisei thu leh AI hmanga donor leh implementation agency-te tuah rem theihna an buaipui mek thu sawiin, kalkhawmte chu he zirhona hun hi an hlawkpui ngei theih nan duhsakna a hlan a ni.

CSR Cell, Govt of Mizoram leh CII-te tangkawpin a buatsaih workshop-in a tum ber chu NGO-te hnena CSR chungchanga dan awmte zirtir leh corporate-te nena an indawr theih nana puibawm a ni a. An tana thupui tangkai turte – dan zawm tura mamawh te, inrelbawl dan entawntlak te, sum hmuhchhuah theih dan te leh dilna ziah dan te – zirtir an ni ang a. A taka an kalpui theih nan tihchhinna hun (mock pitching exercise) pawh an nei ang a. He workshop-a telte hian industry lian atanga CSR head lo kalte atangin anmahni chawk phur thei tur, mi hlawhtlingte chanchin an ngaithla dawn bawk a. He zirhona hun hian August 2025-a New Delhi-a hman tur, CII flagship programme, CSR Connect-a tel tura NGO-te lo buatsaih lawk a tum bawk a ni.

CSR Capacity Building Workshop hi Pu Vanlaldina Fanai, Planning Department Commissioner chuan kaihruaiin, Pu Madhurjya, CII Mizoram Member chuan kalkhawmte lawmna thu a sawi a. He zirhona hunah hian department hotute bakah Mizoram CSR Cell member-te leh Pu P. Baruah, CII Director, State Head for Arunachal Pradesh, Manipur and Meghalaya, Pi Lalchhanhimi A, CII Executive Officer, State Head for Mizoram, leh NGO hrang hrang aiawhte an tel a ni.