Saitual Town Officer's Club ten HSLC leh HSSLC-a zirlai ti thate lawmpuina hlan

Hnahthial Post | June 25, 2025: Vawiin khan Saitual Town Officers' Club (STOC) buatsaihin Saitual Auditorium-ah HSLC leh HSSLC-a Distinction-a pass zirlaite lawmpuina hlanna hun leh eizawnna kawng inkawhhmuhna (career guidance) neih a ni a, he hunah hian District Bawrhsap Dr. Lalngura Tlau chu khuallian niin hun a hmanpui.

He inkhawmah hian khuallian Dr. Langura Tlau chuan thu sawiin, Saitual Town Officers' Club ten zirlai ti thate lawmpuina hun an buatsaih chu lawmawm a tih thu a sawi a, hetiang programme hi nei chhunzawm zel turin STOC member te chu a ngen nghal a ni. Bawrhsap chuan HSLC leh HSSLC-a zirlai ti thate chu chhuanawm a tih thu a sawi a, exam la hmachhawn tur zirlaite pawh lawmpuina dawng pha ngei tura tan la turin a fuih bawk a ni.

Dr. Lalngura Tlau chuan hlawhtlinna kawng hi kawng awlsam tak a ni lo tih a sawi a, zirlaite chu hlawhtlinna rah hmu tur chuan harsatna tuar chhuah an inhuam a ngai a ni, a ti. Midangte nena inkhaikhin lo turin zirlaite chu bawrhsap chuan chahin, thiante duh thlan ang thlang ve ngawt loa, mahnia duhthlanna dik tak siam turin a fuih nghal a ni. Bawrhsap chuan thil ropui tak intanna chu thil te tak te a ni thin ang bawkin hlawhtlinna chang tur pawhin te tak tea bul tan chang a awm thin a ti a, zirlaite chu an nitin nun hmannaah hmasawn tum zel tura fuihin, hlawhtlinna chang theuh turin duhsakna a hlan nghal a ni.

Saitual Town atang hian HSLC distinction-a pass zirlai 6 an awm a, chungte chu Govt. Saitual High School atang Laldingpuii, Ruthi Vanlalthatluangi leh Lalengmawia Pachuau an ni a, Presbyterian English School, Keifang atang C.

Lalduhawma leh Malsawmdawngzela te niin, Graceland Adventist School atang Zodinpuii a ni bawk a ni. HSSLC distinction-a pass hi 2 an awm a, Govt. Saitual Higher Secondary School atang Malsawmhlui leh District Higher Secondary School, Keifang atang R. Lalmuankimi te an ni.

Vawiina lawmpuina hlanna inkhawm hi Er. Dengchungnunga, President, STOC chuan a kai huai a, Pu Lalnunpuia, Supdt chuan hunserh hmangin, report hi Pu H. Lalhmangaihzuala, Secretary, STOC hnen atang ngaihthlak a ni. Khuallian Dr. Lalngura Tlau, DC chuan thu sawiin, Pi F. lalrindiki, Treasurer, STOC chuan lawmthu sawinain hun a khar a ni.

Lawmpuina inhlanna inkhawm zawhah hian eizawnna kawng inkawhhmuhna (Career guidance & Counseling session) neih a ni a, mithiam thlan bik 'Resource Person' atan Pu Lalhruaitluanga, Founder & CEO, ZoCareer Solutions chu ruat niin, a ni hian powerpoint presentation hmangin zirtirna a pe a, zawhna leh chhanna hun hlawkthlak tak zirlai naupangte nen an hmangho a ni. 2nd Session hi Pu Zohmangaiha Tochhawng, Fin. Secy, STOC chuan a kai hruai a, Pu Micky R. Lalenkawla, DEO hnen atang thusawi ngaihthlak a ni bawk a ni.