Hnahthial Post | 12th June, 2025: Vawiin khan Directorate of Information & Public Relations chuan Mizorama YouTubers-te pualin Social Media-a thu thar theh darh leh an thil chhuah chungchanga fimkhurna tur leh a kaihhnawih awm theite zir hona, ‘Media Sensitization for YouTubers’ chu Lianchhiari Run, I&PR Conference hall-ah a buatsaih a, he hun hi Pu C. Lalnunkima, Director, Information and Public Relations Department chuan a kaihruai a ni.
He hunah hian Prof. Irene Lalruatkimi, HOD, Department of Mass Communication, Mizoram University chu Resource Person a ni a. Social media pawimawhzia a lem nena entirin tunlai khawvela YouTuber-te pawimawhzia a sawi a. YouTuber-te chu khawtlang siamtha thei tu, hnam nunzia leh mizo tawng humhalh tu an nih theih bakah sawrkar khalh ngil tu an nih theih dan te a sawi a; thu thar thehdarh tute pawimawhzia sawiin Democracy inrelbawlna banpui pawimawh tak tak zinga mi, ‘4th Pillar’ ti hiala hriat an nih thute sawiin thu thar theh darh leh thil post chungchanga fimkhurna tur thil pawimawh hriattur chi hrang hrangte a sawi bawk a ni.
Mizo YouTubers Association hi kum 2022-a din niin tunah hian Member 60 chuang an awm mek a. Vawiina hun hmanah hian Mizo YouTubers Association member thahnem tak bakah I&PR Officer leh Staff te an tel a ni.
Mizo YouTubers Association aiawhin Pu Harry Khiangte, President, Mizo YouTubers Association; Pu Mani-a (Mizo Official Channel) bakah Pu Vanneihthanga (Mizo Special Report); Pu Mapuia (FTH); Pi Mali (Runmawi Executive Producer); Pu Vanlalpianga (Vanlalpianga Official Channel) leh Pi Mawitei (M&N Family) ten thu sawina hun an nei bawk a. Pi Mina Zoliani Joute, Joint Director, Directorate of I&PR chuan lawmthu sawiin hun hi a khar a ni.
Tags
News