MZP Buatsaihin Remna Ni 2025 hman a ni

Hnahthial Post | June 30, 2025, Aizawl: Vawiin khan MZP General Headquarters bultumin Aizawl lammualah Remna Ni hman a ni a. Pu Lalduhoma, Chief Minister chuan khuallian niin a hmanpui a, nupui Pi Liansailovin a tawiawm.

Khuallian hian Remna Ni Flag pawt pharhin, 1st Bn. MAP Brass Band ten "Ro min reksak ang che" tih hla mawi takin an rem a, inkhawmna hi tan zui nghal a ni.

Thusawiin Chief Minister chuan khawvel hmun hrang hranga cheng zofate chibai a buk a. Remna Ni chu MZP President-in min ngen ang khan hmun khatah lungrual takin hmangza thei ila ka duh hle a ni, a ti.

Indona hi a man a to em em a, fahrah leh hmeithai a siam a, ralthuam siam nan sum leh pai tam tak a luangral a. Zalenna a bo va, ram hmasawnna a tithuanawp a, a awmsa pawh a tichhe thin. Remna leh muanna hlutzia hre tawh hnam kan nih ang ngeiin kan ramah remna a awm zel theih nan sawrkar chuan theihtawp kan chhuah dawn a ni, a ti.

Ram leh ram indona ni lo, sakhua vanga indona te hi nunna latu langsar a ni. Christian sakhaw chhungah pawh ngaihdan inang lo vanga inepna a awm zel a. Kan ramah ngei pawh a thleng mek a, khawhar ina lam za thin te Biak In pakhatah kan inkhawm thei lo. Heng kan ngaihdan inan lohna te hi inhrethiam tlang taka kan kalpui a ngai. Remna hi kawng tinrengah i vawng nung thiam ang u.

Inkalpawhna kawngah Mizoram chhim lam leh hmar lam atangin nasa takin hma kan sawn dawn a. Hnam dang, sakhaw dangte nen tun aia hnai zawkin kan khawsa chho zel dawn. Thiamna leh hmasawnna avangin khawvel hi a zim tial tial a, kan inhnai tial tial. Heng kawngah pawh hian remna i vawng nung thiam ang u.

Mizo Nationalism hi vai huat tihna a ni lo. Nationalism dik tak chu hnam dang te thiana siam a, an hmasawn anga hmasawn ve a, a tul anga an hnen atanga zir leh thawhpui a ni. Tin, central sawrkar nena kan inrem a, kan kal dun thiam a ngai. Mizoram tana a that phawt chuan central-ah eng party pawh sawrkar se, kan thawhpui thei tur a ni.

Politics ah inremin awm ila, mawi lo taka inbeihna hi tibo ang u. Kan khawlai hi ralmuang rawh se, tuallaiah zurui awm suh se. Khawlaia buaina siam te hi bo rawh se. I titawp ang u. Mipa chu tuallaiah a inhrosa tur a ni ngai lo ve. Thenawm khawveng te nen pawh inrem ang u. Chawhmeh te hi insuah tawn ang u.

Hman niah kan Home Minister-in Press Conf. ah, Mizorama dan bawhchhiatna thlentu zat ve hi raltlante thlen a nih thu a tarlang a. Kan unau, fel tak tak te kara misual tlem a zawngte thiltih hi a pawi ka ti. Kan unaute hian kan dan te hi lo zah rawh se, kan khawtlang nunphung leh tihdan te lo pawmin lo zawm ang che u, tiin a chah.

Inkhawm hi Dr. C. Lalremruata, Vice President, MZP in a kaihruai a, Rev. Dr. Lalhmangaiha, General Secretary, CCM in hunserh a hmang a, Pu Chinkhanmanga Thomte, GS, MZP chuan report a pe.

MZP chuan siam that theih tawh loh thil hlui, kan thian leh unaute tina thei thute sawi chhuak tawh lo va, kan zaa lungrual taka Remna Ni lawm hi kan duh a ni, a ti.

Pu H. Lalthianghlima President pawhin thusawiin, Remna Ni hi tu ta bil mah a ni lo va, ka zaa ta a ni. Chuvang chuan mi zawng zawng huapzo turin MZP chuan a lawmna kan buatsaih a, fatuah kan tang mai a, ram mipuiten lungrual taka min zawm hi kan beisei a ni, a ti.

Lammualah hian zirlai naupang enge maw zat an pungkhawm a, Hla do chham, Cheraw, Drama leh Concert te nena lawm a ni.

He hunah hian Pu K. Sapdanga, Home Minister, Pu B. Lalchhanzova, Minister, Pu F. Rodingliana, Minister, Pu Lalfamkima, Deputy Speaker, Pu Lalmuanpuia Punte, Adviser to CM bakah ram hruaitu enge maw zat an tel.

Kum 2018 atang khan MZP chuan Remna Niah hian Remna atana thawhhlawk te hnenah chawimawina an pe thin a. Kum 2018 khan Pu Lal Thanhawla, Pu Laldenga leh Pu Lalkhama te an chawimawi a. Kum 2019 ah Dr. HS Luaia, Rev. Dr. Zairema, Rev. Dr. Lalngurauva Ralte leh Pu Lalduhoma te an chawimawi a. Kum 2022 ah Rev. Dr. Lalsawma, kum 2023 ah MKHC, kum 2024 ah Pu JH Rothuama, Pu P. Lalupa, Pu Lalthanzauva leh Pu Ngurchhina te an chawimawi a. Kuminah erawh chuan chawimawina pek chhuah an nei lo thung.