Remna Ni champha pualin India hmarchhak innghirnghona kara remna leh muanna chungchang zir hona neih a ni

Hnahthial Post | June 30, 2025, Aizawl: Vawiin khan Remna Ni pualin Aijal Club-ah India hmarchhaka innghirnghona kara remna leh muanna chungchang zirhona ‘National Seminar on Understanding Conflicts and Peace in North East India’ tih chu buatsaih a ni a. He hun hi Zoram Research Foundation (ZORF) leh NEICC Peace Centre, Shillong leh Aijal Club-te tangkawpin an buatsaih a ni a. I&PR, P&S Minister Dr. Vanlalthlana chu khuallian niin a hmanpui a ni.

He huna khuallian Dr. Vanlalthlana chuan hun hrehawm tak paltlanga mipui tawrhna nasa tak kara Mizoram in remna a neih chhoh dan sawiin, kum heti zat state ralmuang a kan awm ta hi lawmawm a ti a. Thangthar ten he Peace Accord pawimawhna hi an hriat chian a an zir thar zel chu thil tul tak a nih thu a sawi a. Remna a awm theih nan a kohhran hmalakna pawimawhna te, Inremna avanga state in hmasawnna kawng hrang hrangah hmuh phah in, zirna kawngah ringawt pawh kim 1966 ah Mizoram literacy rate chu 36% vel chauh niin tunah chuan India rama Most Literate State a sawi kan nih tak thu te a sawi a. ZORF Executive Committee Member ni reng thin, tuna ZORF Patron ni mek Dr. Vanlalthlana chuan thalai ten kan state history atanga in zir in, hmasawn na theih tawp chhuah a state tan kan thiamna te hi vision nei reng chung a hmalak zel a tul thu a sawi a ni.

Zirhona hawnna inkhawm hi ZORF Executive Committee Member Rev. Dr. Lalchungnungan a kaihruai a. ZORF Chairman Prof. Thangchungnungan inlawmna thu a sawi a. Keynote Address sawitu North East India Christian Council (NEICC) General Secretary Rev. Dr. Ramengliana chuan Mizoramin remna hi kum 40 dawn lai lo nei tawh in, hmaasawnna tur leh ei leh bar a intodelh erawh a la tur in ngaihtuah a ngaih thu a sawi.

Chawhnu lama zirhona hunah India hmarchhaka innghirnghona boruak hrang hrang inlumlet reng kara remna leh muanna chungchang chu India hmarchhak state hrang hrangte fang kual a, a hmun ngeia kal a zirchiang thintu, NEICC Peace Centre-a Coordinator Dr. Zohmangaihi Rokhumin a sawi a. Pachhunga University College zirtirtu leh ZORF Executive Committee Member ni mek Dr. Lalnundika Hnamte leh Dr. Vanlalvenpuia ten Peace Accord dangte aia kum 39 a upa Mizoram Peace Accord tlo bik nachhante an sawi bawk a. Thupuite hi Respondent pahnih Pi Zohmangaihi Pachuau, M.Th. (Old Testament) leh ICFAI University zirtirtu Dr. Lallawmzuala Khiangte ten an sawi zui a, sawihona hun hman zui a ni.

Chawhnu zirhona hun hi Pachhunga University College zirtirtu Dr. Rohmingmawiin a kaihruai a, ZORF General Secretary Pu Rochamliana chuan lawmthu sawiin.hun a khar a ni.