Polling Station a vote thlak turte rualkhai zawka sem an nih theih dan tur relin District Level Committee on Election for Hnahthial District thutkhawm

Hnahthal Post | June 23, 2025, Hnahthial: Vawiin khan Hnahthial DC Meeting Hall-ah District Election Officer (DEO) leh Bawrhsap ni bawk, Pi K. Vanlalruati kaihhruaiin District Level Committee on Election for Hnahthial District an thutkhawm a. Hnahthial Town chhung VC Polling Station mila MLA leh MP election Polling Station-te siamrem a nih theih dan tur bakah rualkhai zawka voters sem rual an nih theih dan tur relin BLO, VC, NGO leh party hrang hrang aiawhte an thukhawm.

DEO, Pi K. Vanlalruati chuan thutkhawmna koh a nih chhan chu Polling stations rualkhai zawka siamrem (Rationalization of Polling Stations) a nih theih dan tur rel ho an nih thu a sawi a. Village Council inthlanna leh MLA inthlannaah mipuiten vote thlak kawnga harsatna an tawh loh nan VC inthlanna atana Polling Station leh MLA inthlanna atana Polling Station chu inmil zawka siamrem chu an thutkhawm chhan ber a nih thu a sawi.

Thutkhawmnaah chuan MLA Polling Station awm sa thlir ho niin Polling Stations thar awm dan tur rel ho a ni a. Polling Station paruk awm sa bakah Polling Station thar - Hnahthial VII P/S, Kanaan leh Venglai mipuiten vote an thlak theihna tur chu Govt. Primary school -I ah hun ni se tiin thutkhawmna chuan a rel a, Hnahthial -II P/S chu Bazaar Veng mipuite chauh vote thlakna tura ruahman a ni. Hei bakah hian mipuite tana awlsam zawk leh BLO te tan zangkhai zawka vote thlak ni a hun hman a nih theih nan area thenkhat siamrem a ni bawk.

Thutkhawmnaah hian Deputy District Election Officer, Pu Zothanmawia Khiangte; Election Officer, Pi Esther Leihang; Pu Lawrence Lalhlanthara, SDC bakah officials dangte an tel a ni.