Hnahthial Post | June 23, 2025, Hnahthial: Vawiin khan Hnahthial DC Meeting Hall-ah District Election Officer leh Bawrhsap ni bawk, Pi K.Vanlalruati kaihhruaiin rualbanlo (PwD) leh kum upa (Senior Citizens) te electoral roll-ah kim taka thun an nih theih nan leh vote awlsam zawka an thlak theih dan tur ngaihtuahin District Monitoring Committee on Accessible Election (DMCAE) chu an thukhawm.
Pi K. Vanlalruati chuan BLO tinte hnenah PwD leh Senior citizens hriate chuan report an pek zel theih nan inhrilhhriatna (awareness) tam thei ang ber neih a tul thu sawiin Election lamin an siam, apps hrang hrang te pawh hman tangkai inzirtir a tul thu a sawi a. Chu mai bakah natna benvawn nei, awm hmuna panchilh ngai natna neite chu an BLO theuh hnenah in report thin tura a duh thu a sawi a ni.
Election Officer, Pi Esther Leihang chuan thutkhawmna neih anih chhante tarlangin DCMAE thutkhawmna koh a nih chhan chu rualbanlo (PwD) leh kum 85 aia upa vote nei (senior voters) te kim taka Electoral roll a thun an nih theih nan leh e-roll a chuang sa ho ten an Polling station awlsam zawka an hriat theih nana inhrilhhriatna leh hmalakna awm theite thlir ho a nih thu a sawi a. PwD leh Senior citizens hnuaia awm thei si, ECI hnuaiah chhinchiah si loh hria an awm anih chuan an BLO theuhte hnenah hrilhhre turin a chah nghal a ni.
Election Commission of India (ECI) chhinchiah danin 29-South Tuipui A/C ah hian tun dinhmunah voter 16,437 an awm a. PwD hi mi 61 awmin Voters awm zawng zawng atanga chhiarin rualbanlo ( PwD) voters hi 0.37% an ni a. Polling Station hi 27 awmin PwD awm lohna P/S pariat (8) an awm a ni.
Election Commission of India (ECI) chhinchiah danin 29-South Tuipui A/C ah hian kum 85 chunglam vote nei, Senior citizens hi mi 78 awmin vote nei zawng zawng atanga chhiarin 0.47% an ni a. Senior Citizens neilo Polling Station pasarih (7) an awm a ni.
Tags
News