Saitualah Foreigner Identification Portal-a raltlante chhinchhiah dan tur relin thu khawm

Hnahthial Post | June 24, 2025, Saitual: Vawiin khan Saitual DC Office Chamber-ah, District Bawrhsap Dr. Lalngura Tlau kaihhruainain Foreigner Identification Portal-a biometric leh demographic hmanga raltlante chhinchhiah dan tur relin District officers te thu khawm.

Ministry of Home Affairs, Govt. of India chuan raltlan India rama chengte chu Foreigner Identification Portal-ah biometric leh demographic hmanga chhinchhiahna kalpui turin ruahmanna a siam a, hemi chungchanga Mizoram Home Department-in thu a chhuah angin Saitual District-a raltlan awmna khuaah te he hna hi kalpui tur a ni.

District Level Committee on Displaced Persons chu DC kaihhruaiina hnuaiah din tur a ni a, Committee hian hming chhinchhiahna (enrolment) kalpui turin Team a din ang a, member atan DC office, SP office leh Village Council aiawhte an tel tur a ni. Vawiin thutkhawma rel dan angin Team pahnih din a ni ang a, Team-I te hian Saitual Venglai, Saitual III, Keifang Venghlun, Keifang Leitan, Rulchawm, Ruallung, Mualpheng, Tawizo-ah te enrolment hi an kalpui ang a, Team-II te hian Kawlbem, Ngopa Chhimveng, Ngopa Hmarveng, Hliappui leh Dilkhan-ah te enrolment hi an kalpui bawk ang. Saitual District-ah hian Myanmar raltlan mi 211 an awm a, Manipur raltlan hi mi 244 an awm bawk a ni.

Biometric Enrolment Nodal Officer atan hian Pu J. Lalawmpuia Renthlei, SDC chu ruat a ni a, State Level Training on modified Foreigner Identification Portal June ni 20, 2025-a neih takah khan telin, District-ah Master trainer niin enrolment kalpui tura chanvo neite hnenah training hi a pe leh dawn a ni. July 2025 chhung hian District zawng zawng te chu raltlante biometric enrolment kalpui tan tura tih an ni.

Vawiin thutkhawm hi District Bawrhsap Dr. Lalngura Tlauin a kaihruai a, Pu Lallawmawma, Addl. DC, Pu J. Rokima, Addl. SP, Pu Lalthakima Chhangte, SDO (S), Pu J. Lalawmpuia Renthlei, SDC leh Pi F. Zodingpuii, DIPRO te an tel a ni.