Union Minister of State, Shri Ajay Tamta-in Hnahgthial District tlawhin School leh Hospital sak mek a enfiah

Hnahthial Post | 2nd June, 2025: Union Minister of State for Ministry of Road Transport and Highways (MoRTH), Shri Ajay Tamta chuan Hnahthial District chu vawiin khan tlawhin Samagra Shiksha hnuaia Higher secondary school building sak mek leh NESIDS hnuaia Hnahthial District Hospital sak mek chu a hmunah a endik a. Endikna a neih zawh hian Hnahthial District chhunga Head of Office-te nen DC Conference Hall-ah central scheme pawimawh zualte thlirhona neiin Minister chuan a thil hriatchian duhte zawhna hun atan a hmang a ni.

Union Minister of State chuan Samagra Shiksha hnuaia Science leh Commerce stream tana Higher Secondary School building sak mek chu a hmunah endikin sak tawh chin dinhmun leh an harsatna tawhte a zawt a. District Education Officer, Pu H. Sangthanga chuan Science stream awmna tur, 4th floor thleng chu sak zawh a nih tawh thu tarlangin Commerce stream awmna tur 5th floor chu tun dinhmunah 60% vel zawh fel a nih tawh thu a tarlang a, harsatna lian tham sawi tur an neih loh thu a tarlang bawk. Building-ah hian ground floor chhiar tel lohvin floor tinah classroom pakhat theuh awm tura ruahmanna siam niin a vaiin zirlai 120 vel awm thei tura beisei a ni.

Minister chuan District Hospital chu tlawh nghalin ward hrang hrang a fang kual a. Hospital-in harsatna an neihte zawtin NESIDS hnuaia sak, khum 50 awm theihna tur, District Hospital main building sak mek chu a hmunah a enfiah nghal a ni.

School leh Hospital a tlawh zawh hian DC Conference Hall-ah Head of Office te nen Hnahthial District chhunga central schemes kalpui a nih dan thlirhona an nei a. Pu Zothanmawia Khiangte, Addl. DC chuan he hun hi kaihhruaiin Pu R. Vanlalruata, SDC chuan powerpoint presentation hmangin Minister chu central schemes hrang hrang kalpui a nih dan a entir a. Minister chuan schemes kalpui a nih danah zawhna a neihte zawtin schemes changtu department aiawh te nen inkawm hona an nei nghal a ni.