Hnahthial Post | July 10, 2025, Hnahthial: Vawiin khan Hnahthial DC Conference Hall-ah "National Training programme for Booth Level Officers within Hnahthial District" buatsaih a ni a. Training hi Electoral Registration Officer, Pu Zothanmawia Khiangte chuan hawngin, Election Officer, Pi Esther Leihang leh AERO, Pu R.Vanlalruata te chuan BLO-te hi training an pe a ni.
ERO, Pu Zothanmawia Khiangte chuan BLO-te chu an hnathawh hi hna chuangliam a ngai lo tura chahin kan ram democracy vawn himna hna pawimawh tak an thawk a ni tih hre chunga theihtawp chhuah turin a chah a. Voters te hming, address, pian kum leh a dang dang siamthat ngai awm thinte chu siamthat a tul chhan chipchiar taka rawn tarlang thin turin a chah bawk.
Training hi session thum a then niin session hmasa zawkah hian Election Officer, Pi Esther Leihang chuan Special Intensive Revision (SIR) neih tur atana tih tul leh ngai te zirtirin Form 6,6A, 7 leh 8 fill up dan tur te chipchiar zawkin a hrilhfiah a. BLO te hriattur, BLO App leh Voter Helpline App hman dan bakah tul leh mawmawh hrang hrangte zir nan hun hman a ni.
Session hnihna hi Assistant Electoral Registration Officer, Pu R.Vanlalruata chuan kaihruaiin BLO te mawhphurhna, a taka form fill up dan tur leh BLO ten voters awmte an ziah luhna kawnga buaina hrang hrang an tawh theihte a taka zir chhina hun atan hman a ni a. Session thumna ah hian BLO App a taka hman dan tur zir niin BLO ten an hriatthiamloh te zawhfiah nan hun hman a ni.
Tags
News